DakshTimes News Network
गोरेगाव पूर्वेत डिंडोशी पोलिसांची मोठी कारवाई; ६४० ग्रॅम एमडी ड्रग्ज हस्तगत
काशिनाथ शिंदे
मुंबई, प्रतिनिधी : मुंबईतील अमली पदार्थांच्या तस्करीविरोधात डिंडोशी पोलिसांच्या अमली पदार्थविरोधी पथकाने मोठी कारवाई केली आहे. गोरेगाव पूर्व परिसरातून तब्बल १ कोटी २८ लाख रुपये किमतीचे ६४० ग्रॅम मेफेड्रोन (एमडी) जप्त करण्यात आले असून, याप्रकरणी एका आरोपीला अटक करण्यात आली आहे. या कारवाईमुळे अमली पदार्थांच्या तस्करीचे जाळे पुन्हा एकदा चर्चेत आले आहे.
पोलिसांनी दिलेल्या माहितीनुसार, २६ ऑक्टोबर रोजी दुपारी सुमारे ४.४० वाजण्याच्या सुमारास गोरेगाव पूर्वेतील हनुमान नगर, फिल्म सिटी रोड परिसरातील सॅटेलाइट टॉवरजवळ एक व्यक्ती निळ्या रंगाची बॅग घेऊन संशयास्पदरीत्या उभी असल्याचे पोलिसांच्या निदर्शनास आले. पोलिसांनी तत्काळ त्याला ताब्यात घेऊन बॅगेची तपासणी केली. यावेळी बॅगेत मोठ्या प्रमाणात मेफेड्रोन हा अमली पदार्थ आढळून आला.
पोलिसांनी ६४० ग्रॅम मेफेड्रोन जप्त केले असून, त्याची किंमत सुमारे १ कोटी २८ लाख रुपये असल्याचे सांगण्यात आले. याप्रकरणी डिंडोशी पोलीस ठाण्यात गुन्हा क्रमांक ११७१/२०२६ अन्वये अमली पदार्थ प्रतिबंधक कायदा (NDPS Act) अंतर्गत गुन्हा दाखल करण्यात आला आहे. संबंधित आरोपीला २७ ऑक्टोबर रोजी अटक करण्यात आली असून, या प्रकरणातील इतर आरोपींचा शोध सुरू आहे.
वरिष्ठ अधिकाऱ्यांच्या मार्गदर्शनाखाली कारवाई
ही कारवाई अपर पोलीस आयुक्त शशिकुमार मीना, पोलीस उपायुक्त गजानन राजमाने आणि सहाय्यक पोलीस आयुक्त विजय भिसे यांच्या मार्गदर्शनाखाली करण्यात आली.
डिंडोशी पोलीस ठाण्याचे वरिष्ठ पोलीस निरीक्षक महेंद्र शिंदे आणि पोलीस निरीक्षक शिवशंकर भोसले यांच्या नेतृत्वाखाली पोलीस उपनिरीक्षक शांतमल कोलुरे, पोलीस हवालदार प्रदीप मोरे तसेच पोलीस अंमलदार प्रवीण चव्हाण आणि नवनाथ शिंदे यांनी या कारवाईत सहभाग घेतला.
अमली पदार्थांची विक्री आणि तस्करी रोखण्यासाठी पोलिसांकडून सुरू असलेल्या मोहिमेअंतर्गत ही महत्त्वपूर्ण कारवाई मानली जात आहे. जप्त करण्यात आलेल्या अमली पदार्थांचा पुरवठा कोणाला केला जाणार होता आणि या तस्करीमागे आणखी कोणाचे जाळे कार्यरत आहे, याचा तपास पोलीस करत आहेत.
