DakshTimes News Network
कुणाल मार्केटमधील भीषण आगीत दाखविले प्रसंगावधान; २० वर्षीय आर्याच्या धाडसाचे सर्व स्तरांतून कौतुक
काशिनाथ शिंदे
पिंपरी-चिंचवड : चिंचवड येथील चाफेकर चौक परिसरातील कुणाल मार्केट इमारतीच्या पार्किंगमध्ये लागलेल्या भीषण आगीत प्रसंगावधान राखत सुमारे ७० नागरिकांचे प्राण वाचविण्यात महत्त्वाची भूमिका बजावणाऱ्या कु. आर्या विजय कांबळे (वय २०) हिचा पिंपरी-चिंचवड महानगरपालिकेच्या सर्वसाधारण सभेत विशेष सन्मान करण्यात आला. स्वतःच्या जीवाची पर्वा न करता इतरांच्या सुरक्षिततेसाठी धावून जाणाऱ्या आर्याच्या धाडसाचे सभागृहात कौतुक करण्यात आले.
चिंचवडमधील कुणाल मार्केट इमारतीमध्ये सुमारे ४० दुकाने आणि ३८ सदनिका आहेत. पहाटे दीडच्या सुमारास इमारतीच्या पहिल्या मजल्यावर आग लागल्याचे लक्षात येताच आर्या कांबळे हिने तातडीने आरडाओरडा करून रहिवाशांना सावध केले. तसेच, नागरिकांना सुरक्षिततेसाठी इमारतीच्या टेरेसवर जाण्याचे आवाहन केले आणि अग्निशमन दलाला घटनेची माहिती दिली.
घटनेची माहिती मिळताच अग्निशमन दलाचे जवान घटनास्थळी दाखल झाले. टेरेसवर अडकलेल्या नागरिकांना शेजारील इमारतीत सुरक्षितपणे हलविण्यात आले. आर्याने वेळीच दाखविलेल्या प्रसंगावधानामुळे आणि धाडसामुळे सुमारे ७० नागरिकांचे प्राण वाचविण्यास मदत झाली.
कु. आर्या कांबळे ही डी. वाय. पाटील इंटरनॅशनल युनिव्हर्सिटी, आकुर्डी येथे डिझाइन विषयाच्या प्रथम वर्षात शिक्षण घेत आहे. वयाच्या अवघ्या विसाव्या वर्षी तिने दाखविलेली समयसूचकता, धैर्य आणि सामाजिक बांधिलकी यामुळे तिचे सर्व स्तरांतून कौतुक होत आहे.
महानगरपालिकेच्या सर्वसाधारण सभेत झालेल्या या सन्मानप्रसंगी उपमहापौर शर्मिला बाबर, स्थायी समिती सभापती अभिषेक बारणे, सत्तारूढ पक्षनेते प्रशांत शितोळे, विरोधी पक्षनेते भाऊसाहेब भोईर, शिवसेना गटनेते विश्वजीत बारणे, अतिरिक्त आयुक्त डॉ. कुलदीप जंगम यांच्यासह अन्य पदाधिकारी, नगरसदस्य आणि अधिकारी उपस्थित होते. कार्यक्रमाचे सूत्रसंचालन जनसंपर्क अधिकारी प्रफुल्ल पुराणिक यांनी केले.
आर्या कांबळे हिने संकटाच्या प्रसंगी दाखविलेली धाडसी वृत्ती ही समाजाप्रती असलेल्या जबाबदारीचे उदाहरण ठरली आहे. तिच्या या अतुलनीय कार्याचा गौरव करून महानगरपालिकेने तिच्या धैर्याला सन्मानाची सलामी दिली.
