DakshTimes News Network
विरोधी पक्षनेते भाऊसाहेब भोईर, उपआयुक्त संदीप खोत यांच्या हस्ते प्रतिमांना पुष्पहार अर्पण; देहूरोडमध्ये काँग्रेस कमिटीतर्फेही अभिवादन
काशिनाथ शिंदे
पिंपरी : माजी पंतप्रधान भारतरत्न इंदिरा गांधी यांच्या पुण्यतिथीनिमित्त आणि देशाचे पहिले उपपंतप्रधान भारतरत्न सरदार वल्लभभाई पटेल यांच्या जयंतीनिमित्त पिंपरी-चिंचवड महानगरपालिकेच्या वतीने अभिवादन करण्यात आले. यानिमित्त राष्ट्रीय एकता दिनाची शपथ घेऊन देशाची एकता, अखंडता आणि अंतर्गत सुरक्षा अबाधित राखण्याचा संकल्प करण्यात आला.
महानगरपालिकेच्या मुख्य प्रशासकीय इमारतीत आयोजित कार्यक्रमात विरोधी पक्षनेते भाऊसाहेब भोईर आणि उपआयुक्त संदीप खोत यांच्या हस्ते इंदिरा गांधी आणि सरदार वल्लभभाई पटेल यांच्या प्रतिमांना पुष्पहार अर्पण करून अभिवादन करण्यात आले. यावेळी विशेष अधिकारी किरण गायकवाड, जनता संपर्क अधिकारी प्रफुल्ल पुराणिक, महानगरपालिकेचे विविध विभागांतील कर्मचारी आणि नागरिक उपस्थित होते.
सरदार वल्लभभाई पटेल यांची जयंती राष्ट्रीय एकता दिन म्हणून साजरी केली जाते. यानिमित्त उपस्थित मान्यवर आणि कर्मचाऱ्यांनी राष्ट्राची एकता, अखंडता व सुरक्षा अबाधित राखण्यासाठी स्वतःला समर्पित करण्याची, तसेच देशवासीयांमध्ये राष्ट्रीय एकात्मतेचा संदेश पोहोचविण्याची शपथ घेतली.
दरम्यान, भारताच्या पहिल्या महिला पंतप्रधान भारतरत्न स्वर्गीय इंदिरा गांधी यांच्या पुण्यतिथीनिमित्त देहूरोड शहर ब्लॉक काँग्रेस कमिटीच्या वतीनेही अभिवादन कार्यक्रमाचे आयोजन करण्यात आले होते
पुणे जिल्हा काँग्रेस कमिटीचे उपाध्यक्ष, देहूरोड शहर ब्लॉक काँग्रेस कमिटीचे माजी अध्यक्ष तथा नगरसेवक हाजीमलंग काशीनाथ मारीमुत्तू यांच्या मार्गदर्शनाखाली हा कार्यक्रम पार पडला. यावेळी देहूरोड शहर ब्लॉक काँग्रेस कमिटीचे अध्यक्ष चंद्रशेखर काशीनाथ मारीमुत्तू आणि मावळ तालुका अल्पसंख्याक विभागाचे अध्यक्ष गफूरभाई शेख यांच्या हस्ते इंदिरा गांधी यांच्या प्रतिमेस पुष्पहार अर्पण करून अभिवादन करण्यात आले.
या प्रसंगी पुणे जिल्हा महिला काँग्रेसच्या उपाध्यक्षा राणीताई पांडियन, देहूरोड शहर सचिव बबन टोम्पे, ओबीसी सेलचे अध्यक्ष परवेज अत्तार, युवा नेते विष्णू नरसप्पा, वेंकटेश मारीमुत्तू, विश्वास भोसले, प्रवीण भोसले, लोकेश टोम्पे, ज्ञानेश्वर पाटोळे, नरेंद्र गायकवाड, शंकर, तिरुगन्ना संबंधम यांच्यासह महिला कार्यकर्त्या संगीता वर्धा, तावमनी अम्मावशी, कांचन साळुंखे, मालन भोसले आणि राणी नाडार तसेच काँग्रेस कमिटीचे पदाधिकारी व कार्यकर्ते मोठ्या संख्येने उपस्थित होते.
यावेळी उपस्थितांनी इंदिरा गांधी यांच्या देशसेवेतील योगदानाचे स्मरण करून त्यांच्या स्मृतींना अभिवादन केले.
