DakshTimes News Network
सम्राटनगर परिसरात मोठी कारवाई; २०२६ मध्ये आतापर्यंत ३२ कोटींचे अमली पदार्थ जप्त
काशिनाथ शिंदे
मुंब्रा : अमली पदार्थांची तस्करी आणि विक्री करणाऱ्यांविरोधात मुंब्रा पोलिसांनी मोठी कारवाई करत चार विदेशी नागरिकांना अटक केली आहे. सम्राटनगर परिसरात करण्यात आलेल्या या कारवाईत तब्बल १ कोटी ५० लाख २७ हजार ५०० रुपये किमतीचे १ किलो ४९९ ग्रॅम मेफेड्रोन (एमडी) आणि इतर साहित्य जप्त करण्यात आले आहे.
मुंब्रा पोलिसांच्या या कारवाईमुळे अमली पदार्थांच्या तस्करीचे जाळे उघडकीस आणण्याच्या प्रयत्नांना बळ मिळाले आहे. या प्रकरणी चार विदेशी आरोपींना अटक करण्यात आली असून, पुढील तपास सुरू आहे.
दरम्यान, ठाणे पोलिसांनी २०२६ या वर्षात आतापर्यंत अमली पदार्थांच्या गैरव्यवहारप्रकरणी ३९ आरोपींविरोधात कारवाई केली आहे. या कारवायांमध्ये सुमारे ३२ कोटी रुपयांचे अमली पदार्थ जप्त करण्यात आले आहेत. तसेच अमली पदार्थांचे सेवन करणाऱ्या ६३५ जणांविरोधातही पोलिसांनी कारवाई केली आहे.
अमली पदार्थांची विक्री, तस्करी आणि सेवन यांना आळा घालण्यासाठी ठाणे पोलिसांकडून सातत्याने कठोर कारवाई केली जात आहे. विशेषतः तरुण पिढीला अमली पदार्थांच्या विळख्यातून दूर ठेवण्यासाठी पोलिसांनी कारवाईसोबत जनजागृतीवरही भर दिला आहे.
नशामुक्त ठाणे, सुरक्षित ठाणे!
