DakshTimes News Network
काशिनाथ शिंदे
सोलापूर : अंमली पदार्थांची विक्री करणाऱ्यांविरोधात सोलापूर शहर गुन्हे शाखेने मोठी कारवाई करत तब्बल ४८ लाख ४५ हजार ५०० रुपये किमतीचा ९६ किलो ९१ ग्रॅम गांजा जप्त केला आहे. या कारवाईत एका महिलेसह दोघांना अटक करण्यात आली असून, त्यांच्याकडून २५ हजार रुपये किमतीचा मोबाईल फोनही हस्तगत करण्यात आला आहे. मुजमिल अल्ताफ शेख आणि निलोफर इरफान शेख अशी अटक केलेल्या आरोपींची नावे आहेत.
दि. २८ ऑक्टोबर रोजी गुन्हे शाखेचे वरिष्ठ पोलीस निरीक्षक अरविंद माने यांच्या पथकाला भारतनगर परिसरात गांजाची विक्री होत असल्याची गोपनीय माहिती मिळाली. या माहितीच्या आधारे पोलिसांनी भारतनगर क्रीडा संकुल परिसरात सापळा रचला. यावेळी संशयित मुजमिल शेख हा प्लास्टिकच्या पिशवीत संशयास्पद वस्तू घेऊन जाताना आढळला. पोलिसांनी त्याला ताब्यात घेऊन झडती घेतली असता त्याच्याकडे गांजा आढळून आला.
त्यानंतर पोलिसांनी मुजमिल याच्या घराची झडती घेतली. यावेळी प्लास्टिकच्या पिशवीत गांजाच्या ४८ पुड्या आढळून आल्या. तसेच त्याच्या माहितीच्या आधारे महिला आरोपी निलोफर इरफान शेख हिच्या घराचीही झडती घेण्यात आली. या संपूर्ण कारवाईत पोलिसांनी एकूण ९६ किलो ९१ ग्रॅम गांजा जप्त केला.
जप्त केलेल्या गांजाची बाजारातील किंमत ४८ लाख ४५ हजार ५०० रुपये असून, २५ हजार रुपये किमतीचा मोबाईल फोनही पोलिसांनी हस्तगत केला आहे. जप्त केलेल्या गांजाचे नमुने फॉरेन्सिक प्रयोगशाळेत तपासणीसाठी पाठविण्यात आले होते. प्रयोगशाळेच्या तपासणीत तो गांजा असल्याचे स्पष्ट झाले.
याप्रकरणी बाजारपेठ पोलीस ठाण्यात अंमली पदार्थ प्रतिबंधक कायद्यानुसार (एनडीपीएस) कलम ८(क), २०(ब), २(क) आणि २९ अन्वये गुन्हा दाखल करण्यात आला आहे. दोन्ही आरोपींना अटक करण्यात आली असून, या गांजाच्या साठ्यामागे आणखी कोणाचा सहभाग आहे का, तसेच या विक्रीचे जाळे किती मोठे आहे, याचा तपास गुन्हे शाखेकडून सुरू आहे.
पोलीस आयुक्त एम. राजकुमार यांच्या मार्गदर्शनाखाली ही कारवाई करण्यात आली. गुन्हे शाखेचे वरिष्ठ पोलीस निरीक्षक अरविंद माने, सहायक पोलीस निरीक्षक शंकर धायगुडे आणि त्यांच्या पथकाने या कारवाईत सहभाग घेतला.
