DakshTimes News Network
काशिनाथ शिंदे
मुंबई : मुंबईतील अंधेरी पूर्व येथील एमआयडीसी
परिसरात पोलिसांनी अंमली पदार्थविरोधी कारवाई करत तब्बल ६६ लाख ३६ हजार रुपये किमतीचा १ किलो ८९६ ग्रॅम हायड्रो गांजा जप्त केला आहे. या प्रकरणी सातारा जिल्ह्यातील दोन तरुणांना अटक करण्यात आली असून, त्यांच्या अटकेमुळे अंमली पदार्थांच्या विक्रीचे जाळे उघड होण्याची शक्यता आहे.
अटक करण्यात आलेल्या आरोपींची नावे ओमकार राजेंद्र पवार (वय २८) आणि पियुष मधुकर घोंगडे (वय २२) अशी आहेत. २९ ऑक्टोबर रोजी रात्री एमआयडीसी परिसरातील जे. के. इंडस्ट्रियल इस्टेटजवळील पेपर बॉक्स रोड येथे पोलीस गस्त घालत असताना हे दोघे संशयास्पदरीत्या आढळून आले.
पोलिसांनी त्यांची झडती घेतली असता त्यांच्याकडे १ किलो ८९६ ग्रॅम हायड्रो गांजा आढळून आला. जप्त करण्यात आलेल्या या अंमली पदार्थाची बाजारातील किंमत ६६ लाख ३६ हजार रुपये असल्याचे पोलिसांनी सांगितले.
प्राथमिक तपासात दोन्ही आरोपी सातारा जिल्ह्यातून मुंबईत गांजाची विक्री करण्यासाठी आल्याचे समोर आले आहे. याप्रकरणी एमआयडीसी पोलीस ठाण्यात अमली पदार्थ प्रतिबंधक कायद्यानुसार (एनडीपीएस) गुन्हा दाखल करण्यात आला आहे.
दरम्यान, आरोपींना हा अंमली पदार्थ कोठून मिळाला, त्याचे वितरण कोणाला केले जाणार होते आणि या व्यवहारामागे आणखी कोणाचा सहभाग आहे, याचा तपास पोलीस करीत आहेत.
जप्ती : १ किलो ८९६ ग्रॅम हायड्रो गांजा
किंमत : ६६ लाख ३६ हजार रुपये
अटक : सातारा जिल्ह्यातील दोन तरुण
