DakshTimes News Network
विद्यार्थी-प्राध्यापक देवाणघेवाण, संयुक्त संशोधन आणि आंतरराष्ट्रीय शैक्षणिक भागीदारीवर चर्चा; भविष्यात सामंजस्य करार करण्याबाबत सकारात्मक पाऊल
काशिनाथ शिंदे
पिंपरी: भारत आणि झांबिया या दोन देशांमधील उच्च शिक्षण, संशोधन आणि शैक्षणिक सहकार्य अधिक दृढ करण्याच्या दृष्टीने झांबिया सरकारच्या शिष्टमंडळाने पिंपरी चिंचवड विद्यापीठाला (पीसीयू) सदिच्छा भेट दिली. या भेटीमुळे दोन्ही देशांतील शैक्षणिक भागीदारीच्या नव्या संधी निर्माण होण्यास मदत होणार असल्याचे मत पीसीयूचे कुलगुरू डॉ. संतोष सोनवणे यांनी व्यक्त केले.
पिंपरी चिंचवड एज्युकेशन ट्रस्टच्या साते, वडगाव मावळ येथील पिंपरी चिंचवड विद्यापीठात आंतरराष्ट्रीय शैक्षणिक सहकार्य दिनानिमित्त या भेटीचे आयोजन करण्यात आले होते. यावेळी झांबिया सरकारच्या शिष्टमंडळातील क्रेडिट्स अँड स्कॉलरशिप्सचे उपसंचालक डेरिक चिसांगा आणि व्यवस्थापक फ्लेमिंग मुकोशा उपस्थित होते.
यावेळी पीसीयूचे कुलगुरू डॉ. संतोष सोनवणे, आंतरराष्ट्रीय संबंध संचालक डॉ. शंकर देवसरकर, संशोधन व विकास संचालक डॉ. भरत काळे, केनिया येथील विपणन व्यवस्थापक निशा कोटक, आंतरराष्ट्रीय प्रवेश व्यवस्थापक रचना पहुजा, डॉ. रामदास बिरादार आदी उपस्थित होते.
या भेटीदरम्यान भारत आणि झांबिया यांच्यातील आंतरराष्ट्रीय शैक्षणिक भागीदारी विकसित करणे, विद्यार्थी व प्राध्यापकांची देवाणघेवाण वाढविणे, दोन्ही देशांतील विद्यार्थ्यांसाठी उच्च शिक्षणाच्या संधी उपलब्ध करून देणे, तसेच संयुक्त संशोधन आणि शैक्षणिक उपक्रमांना प्रोत्साहन देणे या विषयांवर सविस्तर चर्चा करण्यात आली. भविष्यात दोन्ही देशांतील शैक्षणिक संस्थांमध्ये दीर्घकालीन सहकार्य निर्माण करण्यासाठी सामंजस्य करार करण्याच्या शक्यतेवरही विचारविनिमय झाला.
अशा आंतरराष्ट्रीय शैक्षणिक भागीदारीमुळे विद्यार्थ्यांना परदेशातील शिक्षण आणि संशोधनाचा अनुभव मिळण्याबरोबरच प्राध्यापकांना आपले ज्ञान व कौशल्य आंतरराष्ट्रीय स्तरावर सामायिक करण्याची संधी मिळणार आहे. तसेच संयुक्त संशोधन, नवकल्पना आणि ज्ञानाच्या आदानप्रदानासाठी शैक्षणिक संस्थांमध्ये सहकार्याचे नवे मार्ग खुले होऊ शकतात.
पीसीयूचे कुलपती तथा पीसीईटीचे विश्वस्त हर्षवर्धन पाटील, संस्थेचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, व्यवस्थापन समिती सदस्य अजिंक्य काळभोर, नरेंद्र लांडगे आणि कार्यकारी संचालक डॉ. गिरीश देसाई यांच्या मार्गदर्शनाखाली या भेटीचे आयोजन करण्यात आले होते.
जागतिक शैक्षणिक सहकार्याचा विस्तार करण्यासाठी पीसीयू सातत्याने प्रयत्नशील असून, भारत आणि झांबिया यांच्यातील ही भेट उच्च शिक्षण क्षेत्रातील भविष्यातील सहकार्याच्या दृष्टीने महत्त्वपूर्ण ठरणार आहे.
