DakshTimes News Network
मुलींच्या दोन गटांत प्रथम क्रमांक; मुलांच्या गटातही विद्यार्थ्यांची पदकांची कमाई
काशिनाथ शिंदे
पिंपरी : जिल्हास्तरीय शालेय जिम्नॅस्टिक ॲक्रोबॅटिक स्पर्धेत एस. बी. पाटील पब्लिक स्कूलच्या विद्यार्थ्यांनी दमदार कामगिरी करत शाळेच्या यशात मानाचा तुरा रोवला. १९ वर्षांखालील गटात विद्यार्थ्यांनी विविध प्रकारांत प्रथम, द्वितीय आणि तृतीय क्रमांक पटकावत स्पर्धेवर आपली छाप उमटवली.
निगडी येथील एलिट जिम्नॅस्टिक सेंटर येथे ही स्पर्धा पार पडली. मुलींच्या गटात कृष्णल खंडागळे (इयत्ता सहावी) आणि सावनी बडवे (इयत्ता सातवी) यांनी प्रथम क्रमांक पटकावला. तसेच मिश्र जोडीच्या प्रकारात ओम पाटील (इयत्ता दहावी) आणि ओवी निकम (इयत्ता नववी) यांनी अव्वल स्थान मिळवत सुवर्ण कामगिरी केली.
मुलांच्या गटात विश्वतेज डेरे (इयत्ता सातवी) आणि आयुष मगर (इयत्ता सहावी) यांनी, तर वेदांत देशपांडे आणि अक्षत वारके (दोघेही इयत्ता नववी) यांनी द्वितीय क्रमांक मिळवला. रुद्र जंगीरवाड आणि अमित कोडगोनोरा (दोघेही इयत्ता नववी) यांनी तृतीय क्रमांक पटकावून शाळेच्या यशात भर घातली.
या उल्लेखनीय यशाबद्दल पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर आणि कार्यकारी संचालक डॉ. गिरीश देसाई यांनी विजेत्या विद्यार्थ्यांचे अभिनंदन केले.
विद्यार्थ्यांना मुख्याध्यापक डॉ. बिंदू सैनी, उपमुख्याध्यापक पद्मावती बंडा आणि क्रीडा शिक्षक धनाजी पाटील यांचे मार्गदर्शन लाभले. विद्यार्थ्यांच्या या यशामुळे शाळेच्या शिरपेचात आणखी एक मानाचा तुरा खोवला गेला आहे.
