पुणे | प्रतिनिधी
Savitribai Phule Pune University मधील सहाय्यक कुलसचिवाला कथित धमकी दिल्याच्या प्रकरणी एका राजकीय संघटनेच्या पदाधिकाऱ्यावर चतु:श्रृंगी पोलिस ठाण्यात गुन्हा दाखल करण्यात आला आहे. विद्यापीठ परिसरात घडलेल्या या प्रकारामुळे प्रशासन आणि कर्मचाऱ्यांमध्ये चिंतेचे वातावरण निर्माण झाले आहे.
विद्यापीठाच्या सर्वसाधारण प्रशासन विभागात कार्यरत असलेल्या अजय ठुबे यांनी यासंदर्भात पोलिसांकडे तक्रार दाखल केली. माहिती अधिकार अर्जाशी संबंधित कागदपत्रांच्या मुद्द्यावरून हा वाद निर्माण झाल्याचे समोर आले आहे.
मिळालेल्या माहितीनुसार, संबंधित माहिती अधिकार अर्जातील मुद्द्यांनुसार सुमारे पाचशे पानांची माहिती तयार करण्यात आली होती. नियमानुसार या माहितीसाठी शुल्क आकारण्यात येणार होते. मात्र, अर्जदाराने कमी पानांमध्ये माहिती देण्याची मागणी केली. यावरून दोन्ही बाजूंमध्ये शाब्दिक वाद झाला.
तक्रारीनुसार, कार्यालयात येऊन शिवीगाळ करत जीवे मारण्याची धमकी देण्यात आल्याचा आरोप करण्यात आला आहे. या घटनेनंतर विद्यापीठातील अधिकारी आणि कर्मचारी मोठ्या संख्येने चतु:श्रृंगी पोलिस ठाण्यात दाखल झाले होते. प्रशासनानेही या घटनेची गंभीर दखल घेत वरिष्ठ अधिकाऱ्यांना माहिती दिली.
पोलिसांनी प्राथमिक चौकशी आणि संबंधित माहितीची पडताळणी केल्यानंतर उशिरा रात्री गुन्हा नोंदविण्यात आला. पुढील तपास चतु:श्रृंगी पोलीस करत आहेत.
About the Author
