Oplus_131072
काशिनाथ शिंदे :चिखली
चिखली : आषाढी एकादशीचे औचित्य साधत चिखलीच्या मोरेवस्ती येथील सिद्धिविनायक पब्लिक स्कूल व ज्युनिअर कॉलेज येथे शनिवारी भक्तीमय वातावरणात पालखी सोहळ्याचे आयोजन करण्यात आले. धार्मिक संस्कारांसोबतच विद्यार्थ्यांमध्ये संतपरंपरा, भारतीय संस्कृती आणि सामाजिक मूल्यांची जपणूक करण्याच्या उद्देशाने हा उपक्रम राबविण्यात आला.
पालखी सोहळ्याची सुरुवात शाळेच्या प्रांगणातून झाली. संस्थेचे सचिव मारुती जाधव, अध्यक्षा निर्मला जाधव यांच्या हस्ते पालखीचे पूजन करण्यात आले. यावेळी पालक, विद्यार्थी, शिक्षक आणि शिक्षकेतर कर्मचारी मोठ्या संख्येने उपस्थित होते. सोहळ्यात विद्यार्थ्यांनी विठ्ठल-रुक्मिणी, संत तुकाराम महाराज, संत ज्ञानेश्वर माऊली यांच्यासह विविध संतांच्या वेशभूषा साकारल्या होत्या. तसेच महाराष्ट्राच्या इतिहास आणि संस्कृतीवर आधारित विविध देखावे सादर करण्यात आले. शाळेच्या लेझीम पथकाने आणि ढोल पथकाने पालखी सोहळ्याची शोभा अधिक वाढविली.
पालखी मार्गावर विद्यार्थ्यांनी पारंपरिक फुगडी खेळत वारकरी संस्कृतीचा आनंद लुटला. शाळेपासून सुरू झालेली पालखी मोरे वस्ती, साने चौक, म्हेत्रे गार्डन आणि म्हेत्रे वस्ती या मार्गाने पुन्हा शाळेच्या प्रांगणात दाखल झाली. संपूर्ण मार्गावर विठ्ठल विठ्ठल जय हरी विठ्ठल”, “ज्ञानोबा-तुकाराम अशा नामघोषाने परिसर भक्तिमय झाला. ठिकठिकाणी नागरिकांनी पुष्पवृष्टी करून पालखीचे स्वागत केले.
About the Author
