DakshTimes News Network
काशिनाथ शिंदे
पिंपरी : पिंपरी-चिंचवड शहरातील अनधिकृत बांधकामांविरोधात महापालिकेची कारवाई सुरूच असून, ‘ड’ क्षेत्रीय कार्यालयाच्या कार्यक्षेत्रातील पिंपळे गुरव, प्रभाग क्रमांक २९ येथे अनधिकृत बांधकामावर धडक कारवाई करण्यात आली. प्रभात नगर येथील सुमारे ४३२ चौरस मीटर क्षेत्रफळाच्या आरसीसी बांधकामावर महापालिकेच्या पथकाने कारवाई करत ते जमीनदोस्त केले.
महापालिका आयुक्त डॉ. विजय सूर्यवंशी यांच्या आदेशानुसार तसेच अतिरिक्त आयुक्त तृप्ती सांडभोर आणि उपायुक्त अतुल पाटील यांच्या मार्गदर्शनाखाली ही कारवाई करण्यात आली.
सहायक आयुक्त तथा क्षेत्रीय अधिकारी अश्विनी गायकवाड यांच्या नेतृत्वाखाली ‘ड’ क्षेत्रीय कार्यालयाच्या धडक कारवाई पथकाने ही कारवाई केली. यामध्ये बीट निरीक्षक विकास वारभुवन, सचिन फडतरे, रूपक शिनगारे आणि शिवानी भगत यांच्यासह पाच मजूर, महाराष्ट्र सुरक्षा बलाचे १५ जवान आणि तीन पोलीस कर्मचारी सहभागी झाले होते.
कारवाईसाठी एक जॉ क्रशर, दोन जेसीबी आणि एक ट्रॅक्टर ब्रेकर या यंत्रसामग्रीचा वापर करण्यात आला. आवश्यक पोलीस बंदोबस्त आणि सुरक्षा व्यवस्थेत ही कारवाई पूर्ण करण्यात आली.
महापालिका प्रशासनाकडून शहरातील अनधिकृत बांधकामांवर यापुढेही नियमानुसार कारवाई सुरू राहणार असल्याचे स्पष्ट करण्यात आले आहे.
कोट :
“पिंपरी-चिंचवड महानगरपालिका हद्दीत नियमांचे उल्लंघन करून करण्यात येणाऱ्या अनधिकृत बांधकामांवर नियमानुसार सातत्याने कारवाई करण्यात येत आहे. नागरिकांनी कोणतेही बांधकाम करण्यापूर्वी महापालिकेच्या आवश्यक परवानग्या घेऊनच बांधकाम करावे. तसेच नियमांचे पालन करून शहराच्या नियोजनबद्ध विकासात सहकार्य करावे.”
— डॉ. विजय सूर्यवंशी, आयुक्त, पिंपरी-चिंचवड महानगरपालिका
