मालमत्ता कर वसुलीत दिरंगाई खपवून घेणार नाही! तृप्ती सांडभोर यांचा अधिकाऱ्यांना इशारा

थकबाकीदारांवर जप्तीची कारवाई करा; उद्दिष्टपूर्तीसाठी नियोजनबद्ध मोहीम राबवा

काशिनाथ शिंदे

पिंपरी-चिंचवड महानगरपालिकेच्या मालमत्ता कर वसुलीला गती देण्यासाठी प्रशासनाने कंबर कसली आहे. चालू आर्थिक वर्षातील करवसुलीचे निर्धारित उद्दिष्ट वेळेत पूर्ण करण्यासाठी नियोजनबद्ध मोहीम राबवा, थकबाकीदारांवर नियमानुसार जप्तीची कारवाई करा आणि कामात दिरंगाई करणाऱ्या अधिकारी-कर्मचाऱ्यांवर कारवाई केली जाईल, असा स्पष्ट इशारा अतिरिक्त आयुक्त तृप्ती सांडभोर यांनी दिला.

महानगरपालिका आयुक्त डॉ. विजय सूर्यवंशी यांच्या सूचनेनुसार पिंपरी येथील मुख्य प्रशासकीय भवनातील दिवंगत महापौर मधुकरराव पवळे सभागृहात करसंकलन व कर आकारणी विभागाची आढावा बैठक घेण्यात आली. या बैठकीत मालमत्ता कराची थकबाकी, मालमत्ता जप्तीची कारवाई, मालमत्ता हस्तांतरणाची प्रकरणे, सारथी पोर्टलवरील प्रलंबित तक्रारी आणि मागील बैठकीतील सूचनांवरील कार्यवाहीचा सविस्तर आढावा घेण्यात आला.

पंधरा दिवसांनी करवसुलीचा आढावा

अतिरिक्त आयुक्त तृप्ती सांडभोर यांनी सांगितले की, महानगरपालिकेच्या अंदाजपत्रकात मालमत्ता कराच्या उत्पन्नाचा मोठा वाटा आहे. या उत्पन्नातून शहरातील विकासकामे आणि नागरी सुविधांसाठी आर्थिक नियोजन केले जाते. त्यामुळे करवसुलीचे उद्दिष्ट वेळेत पूर्ण करणे आवश्यक आहे. प्रत्येक सहाय्यक मंडल अधिकाऱ्याने आपल्या कार्यक्षेत्रातील परिस्थितीचा अभ्यास करून प्रभावी करवसुली मोहीम राबवावी. करवसुली वाढविण्यासाठी कोणत्या उपाययोजना केल्या जाणार आहेत, याची लेखी माहितीही सादर करावी.

मागील पाच वर्षांतील मालमत्ता कर संकलनाची आकडेवारी आणि चालू वर्षातील कामगिरी यांची तुलना केली जाणार आहे. मागील वर्षांच्या तुलनेत यंदा करवसुलीत अपेक्षित वाढ होणे गरजेचे आहे. यापुढे दर पंधरा दिवसांनी करवसुलीचा आढावा घेऊन प्रत्येक विभागाच्या कामकाजातील प्रगती तपासली जाणार आहे.

थकबाकीदारांवर जप्तीचा बडगा

ज्या मालमत्तांकडून थकीत कराची वसुली लवकर होऊ शकते, अशा मालमत्तांवर प्राधान्याने लक्ष केंद्रित करावे. थकबाकीदारांना त्यांच्या थकीत कराबाबत वारंवार सूचना द्याव्यात. आवश्यक नोटिसा बजावूनही कराचा भरणा न करणाऱ्यांविरुद्ध नियमानुसार जप्तीची कारवाई करावी. करवसुलीचे उद्दिष्ट साध्य करण्यासाठी आवश्यक त्या कठोर उपाययोजना करताना दिरंगाई करू नये, असे निर्देश सांडभोर यांनी दिले.

नवीन मालमत्तांच्या कर आकारणीला वेग

महानगरपालिकेच्या नवीन मालमत्ता सर्वेक्षणांतर्गत कर आकारणीच्या प्रक्रियेत असलेल्या मालमत्तांची कार्यवाही वेगाने पूर्ण करण्याचे निर्देशही देण्यात आले. निवासी, बिगरनिवासी, मिश्र वापराच्या, औद्योगिक मालमत्ता आणि मोकळ्या जमिनींची माहिती अद्ययावत ठेवण्यावर भर देण्यात आला.

मालमत्ता कराशी संबंधित प्रलंबित तक्रारींचा प्राधान्याने निपटारा करावा. मालमत्ता हस्तांतरणाची प्रकरणे आणि इतर प्रलंबित कामे वेळेत पूर्ण करावीत. करवसुलीच्या प्रक्रियेत येणाऱ्या अडचणी दूर करून निर्धारित उद्दिष्ट साध्य करण्यासाठी सर्व अधिकारी-कर्मचाऱ्यांनी जबाबदारीने काम करावे, असेही त्यांनी स्पष्ट केले.

बैठकीला अधिकारी-कर्मचाऱ्यांची उपस्थिती

या बैठकीस करसंकलन व कर आकारणी विभागाचे उपआयुक्त सचिन पवार, प्रशासन अधिकारी रश्मी देशपांडे, सहाय्यक मंडल अधिकारी बाळू लोंढे, हनुमंत सरवदे, मनोज शिंदे, अजित नखाते, रणजीत भोसले, जयंत मरळीकर, राजेश बांदल, रविंद्र शिंदे, राजेंद्र कुदळे, प्रसाद एच. एस., राकेश सौदे, अतुल काळे, नाना सोनटके, खुकाळे एस., निता राणे, डी. डी. गोरडे, हनुमंत मोरे, मिलिंद कांबळे तसेच इतर कर्मचारी उपस्थित होते.

मालमत्ता कर वसुलीचे उद्दिष्ट पूर्ण करण्यासाठी प्रशासनाने आता नियमित आढावा, थकबाकीदारांवरील कारवाई आणि प्रलंबित प्रकरणांचा निपटारा यावर लक्ष केंद्रित केले असून, अधिकारी-कर्मचाऱ्यांच्या कामगिरीवरही बारकाईने नजर ठेवली जाणार आहे.