DakshTimes News Network
यशवंतराव चव्हाण स्मृती रुग्णालयातील वैद्यकीय अधिकारी डॉ. वैभव म्हस्के यांच्याविरुद्ध विभागीय चौकशीचे आदेश; १५ दिवसांत दोषारोपपत्र दाखल करण्याचे निर्देश
काशिनाथ शिंदे
पिंपरी : रुग्णालयात कर्तव्य बजावताना मद्यधुंद अवस्थेत आढळल्याच्या प्रकरणाची गंभीर दखल घेत पिंपरी चिंचवड महानगरपालिका प्रशासनाने वैद्यकीय अधिकारी डॉ. वैभव अविनाश म्हस्के यांच्यावर निलंबनाची कारवाई केली आहे. महापालिका आयुक्त डॉ. विजय सूर्यवंशी यांनी शुक्रवारी, १६ ऑक्टोबर रोजी निलंबनाचे आदेश जारी केले असून, संबंधित डॉक्टरांविरुद्ध विभागीय चौकशी सुरू करण्यासही मान्यता दिली आहे. या घटनेमुळे रुग्णालयातील अत्यावश्यक सेवांच्या कामकाजात अडथळा निर्माण झाल्याची बाब समोर आली आहे.
डॉ. वैभव म्हस्के हे महापालिकेच्या यशवंतराव चव्हाण स्मृती रुग्णालयात वैद्यकीय अधिकारी म्हणून कार्यरत आहेत. १५ ऑक्टोबर २०२६ रोजी कर्तव्यावर असताना ते मद्यप्राशन करून मद्यधुंद अवस्थेत आढळल्याची बाब रुग्णालयाच्या अधिष्ठात्यांनी सामान्य प्रशासन विभागाच्या निदर्शनास आणून दिली होती. अधिष्ठात्यांनी सादर केलेला अहवाल आणि आयुक्तांची मान्यता विचारात घेऊन प्रशासनाने ही कारवाई केली.
वैद्यकीय सेवा ही रुग्णांच्या आरोग्याशी आणि जीवनाशी थेट संबंधित असल्याने या सेवेत कार्यरत अधिकारी-कर्मचाऱ्यांनी जबाबदारीने आणि सचोटीने कर्तव्य बजावणे अपेक्षित आहे. मात्र, कर्तव्यावर असताना मद्याच्या प्रभावाखाली राहणे आणि त्यामुळे कर्तव्यपालनावर परिणाम होणे हे शासकीय सेवकांसाठी निर्धारित आचारसंहितेच्या विरोधात असल्याचे निलंबन आदेशात नमूद करण्यात आले आहे.
सेवा नियमांच्या उल्लंघनाची नोंद
महाराष्ट्र नागरी सेवा (वर्तणूक) नियम, १९७९ मधील नियम ३ आणि २८ तसेच महाराष्ट्र महानगरपालिका अधिनियमातील कलम ५६ (१) यांचा भंग झाल्याचा निष्कर्ष आदेशात नोंदविण्यात आला आहे. महाराष्ट्र नागरी सेवा (शिस्त व अपील) नियम, १९७९ मधील नियम ४ आणि महानगरपालिका अधिनियमातील कलम ५६ (२) मधील तरतुदींनुसार डॉ. म्हस्के यांना तात्काळ निलंबित करण्यात आले आहे.
याशिवाय, महाराष्ट्र नागरी सेवा (शिस्त व अपील) नियम, १९७९ मधील नियम ८ नुसार त्यांच्याविरुद्ध विभागीय चौकशी सुरू करण्यास मान्यता देण्यात आली आहे. चौकशीच्या अनुषंगाने संबंधित रुग्णालय प्रशासनाला आदेशाची अंमलबजावणी करून पोहोच सादर करण्याचे निर्देश देण्यात आले आहेत. तसेच, १५ दिवसांच्या आत दोषारोपपत्र दाखल करण्याचे आदेशात स्पष्ट करण्यात आले आहे.
निलंबन काळात मुख्यालय सोडण्यास मनाई
निलंबन कालावधीत डॉ. म्हस्के यांना नियमानुसार निर्वाह भत्ता देण्यात येणार आहे. मात्र, त्यासाठी विहित अटींचे पालन करणे बंधनकारक राहणार आहे. या कालावधीत त्यांना अन्यत्र नोकरी किंवा व्यवसाय करता येणार नाही. निर्वाह भत्ता मिळविण्यासाठी अन्यत्र सेवा, नोकरी अथवा व्यवसाय केला नसल्याचा स्वाक्षरीयुक्त दाखला दरमहा २० तारखेच्या आत सादर करावा लागणार आहे.
निलंबन काळात त्यांचे मुख्यालय पिंपरी येथे निश्चित करण्यात आले असून, वरिष्ठांची पूर्वपरवानगी घेतल्याशिवाय त्यांना मुख्यालय सोडता येणार नाही. विभागीय चौकशीच्या निष्कर्षानुसार पुढील प्रशासकीय कार्यवाही केली जाणार आहे.
रुग्णसेवेतील जबाबदारीवर प्रशासनाचा भर
रुग्णालयातील अत्यावश्यक सेवा सुरळीत सुरू राहणे आणि वैद्यकीय अधिकारी-कर्मचाऱ्यांनी कर्तव्याचे पालन करणे महत्त्वाचे आहे. या प्रकरणात महापालिका प्रशासनाने सेवा नियमांनुसार कारवाई सुरू केली असून, विभागीय चौकशीतून पुढील बाबी स्पष्ट होणार आहेत.
