DakshTimes News Network
पिस्तुलाची नळी तोंडात घालून जीवे मारण्याची धमकी; खून, दरोड्यासह अनेक गंभीर गुन्ह्यांची नोंद
काशिनाथ शिंदे
पुणे: खंडणीच्या उद्देशाने व्यावसायिकाच्या मुलाचे अपहरण करून त्याला मारहाण करत पिस्तुलाची नळी तोंडात घालून जीवे मारण्याची धमकी दिल्याप्रकरणी फरार असलेला कुख्यात गुन्हेगार तुषार हंबीर याला स्थानिक गुन्हे शाखेने फुरसुंगी परिसरातून अटक केली आहे. या कारवाईमुळे अपहरण प्रकरणातील तपासाला महत्त्वाचे वळण मिळाले आहे.
३ मार्च २०२६ रोजी कापूरहोळ-नारायणपूर रस्त्यावर व्यावसायिक महेश दळवी यांचा मुलगा पृथ्वीराज दळवी याचे पाच ते सहा जणांनी कारमधून अपहरण केल्याचा आरोप आहे. अपहरणानंतर आरोपींनी पृथ्वीराज याला मारहाण केली. तसेच पिस्तूल आणि कोयत्याचा धाक दाखवून त्याच्या तोंडात पिस्तुलाची नळी घालत जीवे मारण्याची धमकी दिल्याचे फिर्यादीत नमूद करण्यात आले आहे.
या घटनेप्रकरणी राजगड पोलीस ठाण्यात गुन्हा दाखल करण्यात आला होता. गुन्हा दाखल झाल्यानंतर तुषार हंबीर फरार होता. स्थानिक गुन्हे शाखेने त्याचा शोध घेत फुरसुंगी परिसरातून त्याला ताब्यात घेत अटक केली.
दरम्यान, तुषार हंबीर याच्याविरुद्ध यापूर्वी खून, खुनाचा प्रयत्न, दरोडा आणि शस्त्रास्त्र कायद्यांतर्गत अनेक गंभीर गुन्हे दाखल असल्याची माहिती समोर आली आहे. या अपहरण प्रकरणात त्याच्या अटकेमुळे इतर सहभागी आरोपींचा शोध आणि गुन्ह्याच्या पुढील तपासाला गती मिळण्याची शक्यता आहे.
