DakshTimes News Network
‘केंद्रीय गृहमंत्री दक्षता पदक-२०२६’ने राष्ट्रीय स्तरावर गौरव; एनआयएमधील उल्लेखनीय सेवेची दखल
काशिनाथ शिंदे
नवी दिल्ली : दहशतवादाशी संबंधित संवेदनशील गुन्ह्यांच्या तपासात उल्लेखनीय कामगिरी बजावल्याबद्दल आयपीएस अधिकारी ज्योतिप्रिया यांना प्रतिष्ठेचे ‘केंद्रीय गृहमंत्री दक्षता पदक-२०२६’ जाहीर करण्यात आले आहे. सध्या त्या अंमली पदार्थविरोधी कृती दलात (एएनटीएफ) विशेष पोलीस महानिरीक्षक म्हणून कार्यरत आहेत.
राष्ट्रीय तपास यंत्रणेत (एनआयए) कार्यरत असताना ज्योतिप्रिया यांनी दहशतवादाशी संबंधित विविध संवेदनशील प्रकरणांचा सखोल, निष्पक्ष आणि बारकाईने तपास केला. या तपासादरम्यान त्यांनी दाखवलेले व्यावसायिक कौशल्य, कर्तव्यनिष्ठा, समर्पण आणि दृढनिश्चय यांची राष्ट्रीय स्तरावर दखल घेण्यात आली आहे.
कठीण आणि आव्हानात्मक परिस्थितीतही तपासातील सचोटी कायम राखत उत्कृष्ट कामगिरी बजावणाऱ्या पोलीस अधिकारी व कर्मचाऱ्यांच्या कार्याचा गौरव या पदकाच्या माध्यमातून केला जातो. ज्योतिप्रिया यांच्या उल्लेखनीय सेवेची दखल घेत त्यांची या प्रतिष्ठेच्या सन्मानासाठी निवड करण्यात आली आहे.
या राष्ट्रीय सन्मानामुळे पोलीस दलातील त्यांच्या कार्याचा गौरव झाला असून, त्यांच्या यशाबद्दल पोलीस वर्तुळातून अभिनंदन केले जात आहे.
