DakshTimes News Network
अनावश्यक बांधकामे थांबवा; विद्यार्थ्यांच्या फी आणि वसतिगृहासाठी निधी वापरा ;
रिपब्लिकन बहुजन विद्यार्थी परिषदेची सावित्रीबाई फुले पुणे विद्यापीठ प्रशासनाकडे मागणी
पुणे |
सावित्रीबाई फुले पुणे विद्यापीठातील अनावश्यक आणि नियमबाह्य बांधकामे तातडीने थांबवून, त्यावरील निधी विद्यार्थ्यांची शैक्षणिक फी, वसतिगृह शुल्क आणि रिफॅक्टरीमधील भोजनव्यवस्थेसाठी वापरण्यात यावा, अशी मागणी रिपब्लिकन बहुजन विद्यार्थी परिषद (A) च्या वतीने करण्यात आली आहे. राज्यातील दुष्काळजन्य परिस्थिती आणि पाणीटंचाईचे संकट लक्षात घेता विद्यापीठ प्रशासनाने विद्यार्थ्यांच्या मूलभूत गरजांना प्राधान्य द्यावे, अशी भूमिका संघटनेने मांडली आहे.
या मागणीसंदर्भात संघटनेचे पुणे शहराध्यक्ष सुरज श्रीराम गायकवाड यांच्या नेतृत्वाखाली विद्यापीठाच्या कुलसचिवांना निवेदन देण्यात आले. विद्यापीठ परिसरात सुरू असलेल्या विविध बांधकामांची आवश्यकता, त्यासाठी होणारा खर्च तसेच संबंधित बांधकामांना मिळालेल्या शासकीय आणि प्रशासकीय मंजुरीची सखोल तपासणी करण्याची मागणी या निवेदनातून करण्यात आली आहे.
बांधकामांच्या खर्चाची तपासणी करण्याची मागणी
विद्यापीठ परिसरात सुरू असलेल्या बांधकामांपैकी कोणती कामे आवश्यक आहेत आणि कोणत्या कामांवर अनावश्यक खर्च होत आहे, याचा आढावा घेण्यात यावा. लागू शासकीय आदेशांचे उल्लंघन करून बांधकामे सुरू असल्याचे आढळल्यास संबंधित कामे तातडीने थांबवावीत, अशी मागणी संघटनेने केली आहे. तसेच बांधकामांवरील खर्चाचा पुनर्विचार करून उपलब्ध निधी विद्यार्थ्यांच्या शैक्षणिक आणि दैनंदिन गरजांसाठी वापरण्याची शक्यता तपासावी, असेही निवेदनात नमूद करण्यात आले आहे.
आर्थिक अडचणीतील विद्यार्थ्यांना दिलासा द्या
अनेक विद्यार्थ्यांना आर्थिक अडचणींमुळे शैक्षणिक शुल्क भरणे, वसतिगृहाचा खर्च भागवणे आणि भोजनाची व्यवस्था करणे कठीण जात आहे. त्यामुळे आर्थिकदृष्ट्या दुर्बल विद्यार्थ्यांसाठी शैक्षणिक शुल्कात सवलत, फीमाफी आणि आर्थिक मदतीच्या योजना राबविण्यात याव्यात, अशी मागणीही परिषदेकडून करण्यात आली आहे.
एकीकडे विद्यार्थ्यांना आर्थिक संकटाचा सामना करावा लागत असताना दुसरीकडे बांधकामांवर मोठ्या प्रमाणात निधी खर्च होत असल्याने विद्यापीठाच्या खर्चाच्या प्राधान्यक्रमाबाबत प्रश्न उपस्थित होत आहेत. प्रशासनाने विद्यार्थ्यांच्या हिताचा विचार करून या मागण्यांवर तातडीने सकारात्मक निर्णय घ्यावा.
— सुरज गायकवाड, पुणे शहराध्यक्ष, रिपब्लिकन बहुजन विद्यार्थी परिषद (A)
