DakshTimes News Network
महावितरणचे कार्यकारी संचालक दिनेश अग्रवाल यांचा अधिकाऱ्यांना सक्त इशारा; पुणे परिमंडलात अचानक
काशिनाथ शिंदे
पुणे: वीजबिलाच्या थकबाकीपोटी खंडित केलेली वीजजोडणी चालू वीजबिलासह संपूर्ण थकबाकी भरल्याशिवाय कोणत्याही परिस्थितीत पूर्ववत करू नका, अशा स्पष्ट आणि सक्त सूचना महावितरणचे कार्यकारी संचालक (वीज खरेदी) दिनेश अग्रवाल यांनी दिल्या आहेत. ऑक्टोबर महिन्याच्या अखेरच्या दिवशी त्यांनी पुणे परिमंडलातील विश्रांतवाडी आणि वाडिया उपविभागांना अचानक भेट देत थकबाकीदार ग्राहकांच्या खंडित वीजजोडण्यांची प्रत्यक्ष पाहणी केली.
या पाहणीदरम्यान वाडिया उपविभागातील मे. फिस्टहाऊस हॉस्पिटॅलिटी आणि प्रभावती नामदेव पिंगळे या दोन थकबाकीदारांच्या वीजजोडण्यांची तपासणी करण्यात आली. संबंधित ग्राहकांकडे अनुक्रमे ७ लाख ६९ हजार रुपये आणि ५ लाख ४४ हजार रुपये इतकी थकबाकी असल्याचे आढळले. मे. फिस्टहाऊस हॉस्पिटॅलिटी या ग्राहकाकडून हप्त्यांमध्ये पैसे भरले जात असल्याने थकबाकी कायम राहत असल्याचे निदर्शनास आले. त्यामुळे चालू वीजबिलासह संपूर्ण थकबाकी वसूल झाल्यानंतरच वीजपुरवठा पूर्ववत करण्याचे आदेश अग्रवाल यांनी दिले.
वसुलीसाठी अधिकाऱ्यांनी प्रत्यक्ष मैदानात उतरावे!
वीजबिल वसुलीची मोहीम केवळ कार्यालयीन कामकाजापुरती मर्यादित न ठेवता अधिकाऱ्यांनी स्वतः क्षेत्रात उतरून तिचा नियमित आढावा घ्यावा, असेही अग्रवाल यांनी स्पष्ट केले. थकबाकी वसुलीसाठी सुरू असलेल्या उपाययोजनांना अधिक गती देऊन चालू वीजबिलासह संपूर्ण थकीत रक्कम वसूल करण्याचे निर्देश त्यांनी दिले.
वीजग्राहकांना अखंडित आणि दर्जेदार सेवा देणे ही महावितरणची जबाबदारी आहे, तर वेळेत वीजबिल भरणे हे ग्राहकांचे कर्तव्य आहे. ग्राहकांमध्ये नियमित वीजबिल भरण्याची सवय निर्माण करण्यासाठी अधिकाऱ्यांनी सातत्याने पाठपुरावा करावा. थकबाकीचा डोंगर वाढण्यापूर्वीच नियमानुसार वीजपुरवठा खंडित केल्यास सुरक्षा ठेवीतून थकीत रक्कम वळती करण्याची वेळ येणार नाही, असेही त्यांनी नमूद केले.
या आकस्मिक पाहणीवेळी प्रभारी मुख्य अभियंता ज्ञानदेव पडळकर, कार्यकारी अभियंता रवींद्र बुंदिले, अतिरिक्त कार्यकारी अभियंता प्रमोदकुमार गायकवाड आणि अमिता देशमुख उपस्थित होते.
