DakshTimes News Network
कामावर जाताना काळाचा घाला; अपघातानंतर डंपरचालक पसार, फुरसुंगी पोलिसांकडून गुन्हा दाखल
काशिनाथ शिंदे
पुणे : पुणे-सासवड मार्गावरील फुरसुंगी येथे भरधाव हायवा डंपरने दुचाकीला पाठीमागून जोरदार धडक दिल्याने झालेल्या भीषण अपघातात २३ वर्षीय तरुणीचा मृत्यू झाला, तर दुचाकीस्वार तरुण गंभीर जखमी झाला आहे. शनिवारी (दि. ३१ ऑक्टोबर) सकाळी पावणेदहाच्या सुमारास भोसले व्हिलेजच्या प्रवेशद्वारासमोर ही दुर्घटना घडली. अपघातानंतर डंपरचालक घटनास्थळावरून पसार झाला.
माधुरी सतीश जाधव (वय २३, रा. लक्ष्मी निवास, दत्त मंदिराजवळ, भेकराईनगर, फुरसुंगी) असे मृत तरुणीचे नाव आहे. या प्रकरणी अभिजित ज्ञानदेव जाधव (वय ३१, रा. तुळजाभवानीनगर, खराडी) यांनी फुरसुंगी पोलीस ठाण्यात फिर्याद दिली आहे. त्यानुसार हायवा डंपरचालक मनोहर रामदास हाके (वय २९, रा. दत्तवाडी, उरुळी कांचन, मूळ रा. भरतगाव, हाकेवाडी, ता. दौंड) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, माधुरी जाधव या उंड्री येथील एका कंपनीत नोकरीला होत्या. शनिवारी सकाळी त्या अभिजित जाधव यांच्या दुचाकीवरून भेकराईनगर येथून मंतरवाडीकडे कामावर जाण्यासाठी निघाल्या होत्या. भोसले व्हिलेजच्या प्रवेशद्वारासमोर पाठीमागून भरधाव वेगाने आलेल्या हायवा डंपरने त्यांच्या दुचाकीला जोरदार धडक दिली. या धडकेमुळे दुचाकीवरील माधुरी खाली पडल्या. गंभीर दुखापतीमुळे त्यांचा मृत्यू झाला, तर दुचाकीचालक अभिजित जाधव गंभीर जखमी झाले.
धडक दिल्यानंतर डंपर न थांबवता चालक घटनास्थळावरून पसार झाला. अपघाताची माहिती मिळताच वरिष्ठ पोलीस निरीक्षक अमोल मोरे व त्यांच्या सहकाऱ्यांनी घटनास्थळी धाव घेतली. याप्रकरणी फुरसुंगी पोलिसांनी गुन्हा दाखल केला असून, सहायक पोलीस निरीक्षक भूषण पोटवडे पुढील तपास करीत आहेत.
भरधाव अवजड वाहनांचा धसका!
कामावर जाणाऱ्या तरुणीचा अपघाती मृत्यू झाल्याने परिसरात हळहळ व्यक्त होत आहे. शहरातील वर्दळीच्या रस्त्यांवरून धावणाऱ्या अवजड वाहनांच्या वेगावर नियंत्रण ठेवण्याची आणि वाहतूक नियमांची कठोर अंमलबजावणी करण्याची गरज पुन्हा अधोरेखित झाली आहे.
