DakshTimes News Network
स्वच्छ ऊर्जा, आधुनिक तंत्रज्ञान आणि औद्योगिक परिवर्तनाला चालना देण्यासाठी ब्रिटिश कंपन्यांच्या वरिष्ठ प्रतिनिधींसोबत मुंबईत महत्त्वपूर्ण गोलमेज बैठक
काशिनाथ शिंदे
मुंबई : महाराष्ट्रातील औद्योगिक विकासाला गती देणे, स्वच्छ ऊर्जा क्षेत्रात गुंतवणुकीच्या संधी वाढविणे आणि आधुनिक तंत्रज्ञानाच्या माध्यमातून औद्योगिक परिवर्तन साध्य करणे, या उद्देशाने मुख्यमंत्री देवेंद्र फडणवीस यांच्या अध्यक्षतेखाली मुंबईत यूके-महाराष्ट्र स्वच्छ विकास आणि औद्योगिक परिवर्तनविषयक गोलमेज बैठक पार पडली. या बैठकीत महाराष्ट्र आणि ब्रिटन यांच्यातील धोरणात्मक व्यावसायिक भागीदारी अधिक मजबूत करण्यावर चर्चा करण्यात आली.
‘भांडवल, तंत्रज्ञान आणि कौशल्याच्या बळावर यूके-महाराष्ट्र धोरणात्मक व्यावसायिक भागीदारीला चालना’ हा या बैठकीचा प्रमुख विषय होता. स्वच्छ विकास, औद्योगिक क्षेत्रातील बदल, गुंतवणूक आणि तंत्रज्ञानाच्या देवाणघेवाणीच्या माध्यमातून दोन्ही देशांमधील सहकार्याच्या नव्या संधी शोधण्यावर या चर्चेत भर देण्यात आला.
या बैठकीला मंत्री जयकुमार रावल यांच्यासह ब्रिटनमधील नामांकित कंपन्यांचे मुख्य कार्यकारी अधिकारी, मुख्य वित्त अधिकारी, मुख्य तंत्रज्ञान अधिकारी आणि वरिष्ठ व्यवस्थापनातील प्रतिनिधी उपस्थित होते. बार्कलेज, कार्बन क्लीन, ग्लीड्स, ऑक्टोपस एनर्जी जनरेशन, ऑक्सफर्ड नॅनोपोर टेक्नॉलॉजीज, अरुप, बेकर मॅकेन्झी, इलेव्हनलॅब्स, पीडब्ल्यूसी आणि बेनोय ग्रुप यांसारख्या कंपन्यांच्या प्रतिनिधींनी या बैठकीत सहभाग घेतला. तसेच झोइसा नॉर्थ-बॉन्ड आणि इतर नामांकित ब्रिटिश कंपन्यांचे प्रतिनिधीही उपस्थित होते.
महाराष्ट्रात गुंतवणुकीसाठी पोषक वातावरण निर्माण करणे, स्वच्छ ऊर्जेचा वापर वाढविणे, औद्योगिक क्षेत्रात आधुनिक तंत्रज्ञानाचा अवलंब करणे आणि आंतरराष्ट्रीय कंपन्यांसोबत दीर्घकालीन व्यावसायिक संबंध प्रस्थापित करणे, या दृष्टीने ही बैठक महत्त्वपूर्ण मानली जात आहे.
ब्रिटिश कंपन्यांकडील भांडवल, तंत्रज्ञान आणि विशेष कौशल्याचा महाराष्ट्राच्या औद्योगिक विकासासाठी उपयोग करून घेण्याच्या दृष्टीने या चर्चेला महत्त्व प्राप्त झाले आहे. या सहकार्यामुळे राज्यातील उद्योग, ऊर्जा आणि तंत्रज्ञान क्षेत्रात भविष्यात नवीन संधी निर्माण होण्याची अपेक्षा आहे.
मुख्यमंत्री देवेंद्र फडणवीस यांच्या अध्यक्षतेखाली झालेल्या या बैठकीतून महाराष्ट्र-ब्रिटन भागीदारीला नवी दिशा मिळण्याची शक्यता असून, राज्याला जागतिक गुंतवणुकीचे प्रमुख केंद्र बनविण्याच्या प्रयत्नांना यामुळे बळ मिळू शकते.
