DakshTimes News Network
बहुराष्ट्रीय कंपन्यांकडून कामगारांना भरघोस भेट; काहींना एका महिन्याच्या वेतनाएवढा बोनस
काशिनाथ शिंदे
चाकण : राज्यातील ग्रामीण भागात दुष्काळाचे सावट असताना चाकण औद्योगिक वसाहतीतील कामगारांसाठी मात्र यंदाची दिवाळी आर्थिकदृष्ट्या आनंदाची ठरणार आहे. औद्योगिक क्षेत्रात मंदीचे सावट नसल्याने येथील नामांकित बहुराष्ट्रीय कंपन्यांनी कामगारांना ३० हजार ते ५५ हजार रुपयांपर्यंत दिवाळी बोनस जाहीर केला आहे. काही कंपन्यांमधील कामगारांना एका महिन्याच्या वेतनाएवढा बोनस मिळणार असल्याने कामगारवर्गात समाधानाचे वातावरण आहे.
चाकण औद्योगिक परिसरात बजाज ऑटो, महिंद्रा, मर्सिडीज-बेंझ, स्कोडा, फोक्सवॅगन, फोर्स मोटर्स, ह्युंदाई आणि बॉश यांसारख्या वाहननिर्मिती व अभियांत्रिकी क्षेत्रातील नामांकित कंपन्या कार्यरत आहेत. या कंपन्यांमध्ये महाराष्ट्रासह देशाच्या विविध राज्यांतील हजारो कामगार काम करतात.
दरम्यान, वाढती महागाई, अन्नधान्याचे दर, मुलांचे शिक्षण, घरभाडे आणि दैनंदिन खर्च यामुळे कामगारांच्या आर्थिक नियोजनावर ताण येत आहे. अशा परिस्थितीत मिळणारा भरघोस दिवाळी बोनस कामगारांसाठी मोठा आर्थिक दिलासा ठरणार आहे. या रकमेमुळे सणासुदीची खरेदी, घरखर्च आणि इतर आर्थिक गरजा भागविण्यास मदत होणार आहे.
याबाबत स्वाभिमानी श्रमिक कामगार संघटनेचे महाराष्ट्र राज्य अध्यक्ष जीवन येळवंडे म्हणाले, “चाकण औद्योगिक वसाहतीत सध्या मंदीचे सावट नसल्याने कंपन्यांनी कामगारांना चांगला बोनस दिला आहे. काही कंपन्यांमधील कामगारांना ३० ते ५५ हजार रुपयांपर्यंत, तर काहींना एका महिन्याच्या पगाराएवढा बोनस मिळाला आहे.”
एकीकडे ग्रामीण भागात आर्थिक संकटाचे सावट असताना चाकणच्या औद्योगिक क्षेत्रातील कामगारांना मिळालेल्या या बोनसच्या भेटीमुळे यंदाचा दिवाळी सण अधिक आनंदात साजरा होणार आहे.
