DakshTimes News Network
काशिनाथ शिंदे : वाकड
पिंपरी-चिंचवड : ताथवडे येथील पोद्दार इंटरनॅशनल स्कूलमध्ये मुख्य प्रवेशद्वार अंगावर कोसळून सुरक्षा रक्षकाचा मृत्यू झाल्याप्रकरणी वाकड पोलिसांनी शाळेचे प्राचार्य, शाळा प्रशासन आणि गेटच्या देखभालीस जबाबदार संबंधित व्यक्तींविरुद्ध गुन्हा दाखल केला आहे. निष्काळजीपणामुळे मृत्यू झाल्याचा ठपका ठेवत भारतीय न्याय संहिता (बीएनएस) कलम 106(1) अंतर्गत ही कारवाई करण्यात आली आहे.
वाकड पोलीस ठाण्यात गुन्हा क्रमांक 389/2026 नोंदविण्यात आला आहे. पोलिसांनी दिलेल्या माहितीनुसार, 31 जुलै 2026 रोजी सकाळी सुमारे 8.10 वाजता शाळेचे सुरक्षा रक्षक संजय नागनाथ कांबळे हे मुख्य प्रवेशद्वार उघडत असताना लोखंडी गेट अचानक त्यांच्या अंगावर कोसळले. या भीषण अपघातात ते गंभीर जखमी झाले होते. त्यांच्यावर उपचार सुरू असताना 2 ऑगस्ट 2026 रोजी त्यांचा मृत्यू झाला.
या घटनेनंतर वाकड पोलिसांनी वैद्यकीय कागदपत्रे, एमएलसी, पंचनामा, शवविच्छेदन अहवाल, घटनास्थळाची पाहणी तसेच सीसीटीव्ही चित्रफितींची तपासणी केली. या तपासात शाळेचे मुख्य प्रवेशद्वार सुरक्षित स्थितीत नसल्याचे प्रथमदर्शनी आढळून आले. गेटची आवश्यक दुरुस्ती, मजबुतीकरण, नियमित तपासणी आणि आवश्यक प्रतिबंधात्मक उपाययोजना करण्यात आल्या नसल्याने हा अपघात घडल्याचा निष्कर्ष पोलिसांनी नोंदविला आहे.
याप्रकरणी शाळेचे प्राचार्य, शाळा प्रशासन तसेच गेटच्या देखभाल आणि सुरक्षिततेस जबाबदार संबंधित व्यक्तींविरुद्ध निष्काळजीपणामुळे मृत्यू झाल्याप्रकरणी गुन्हा दाखल करण्यात आला असून, प्रकरणाचा पुढील तपास वाकड पोलीस करत आहेत.
