DakshTimes News Network
काशिनाथ शिंदे : ठाणे
ठाणे पोलीस आयुक्तालयाच्या गुन्हे शाखा (घटक-१) ने खंडणीच्या गंभीर गुन्ह्यात मोठी कारवाई करत तब्बल ₹८ कोटींच्या खंडणीप्रकरणी तीन आरोपींना ₹१० लाखांचा पहिला हप्ता स्वीकारताना रंगेहाथ अटक केली. या कारवाईदरम्यान आरोपींकडून ₹१० लाखांची रोकड जप्त करण्यात आली असून, या प्रकरणामुळे ठाणे परिसरात मोठी खळबळ उडाली आहे.
पोलिसांकडे खंडणीसंदर्भात माहिती प्राप्त झाल्यानंतर गुन्हे शाखेच्या पथकाने नियोजनबद्ध सापळा रचला. ठरल्याप्रमाणे आरोपी खंडणीच्या पहिल्या हप्त्याची रक्कम स्वीकारण्यासाठी आले असता पोलिसांनी क्षणार्धात कारवाई करत तिघांनाही रंगेहाथ ताब्यात घेतले. त्यांच्याकडील ₹१० लाखांची रोख रक्कम जप्त करण्यात आली.
या प्रकरणी कलवा पोलीस ठाण्यात गुन्हा दाखल करण्यात आला असून, आरोपींची कसून चौकशी सुरू आहे. या खंडणी रॅकेटमध्ये आणखी कोणाचा सहभाग आहे का, याचाही पोलीस तपास करत आहेत.
या कारवाईमुळे संघटित गुन्हेगारीविरोधात ठाणे पोलिसांनी पुन्हा एकदा कठोर भूमिका घेतल्याचे स्पष्ट झाले आहे. नागरिकांच्या सुरक्षेला प्राधान्य देत गुन्हेगारांविरोधात अशाच धडक कारवाया सुरू राहणार असल्याचे पोलीस सूत्रांनी सांगितले.
