DakshTimes News Network
काशिनाथ शिंदे : चिंचवड
थरमॅक्स चौक, संभाजीनगर येथील श्री गजानन लोकसेवा सहकारी बँकेच्या ताब्यात असलेली सुमारे ₹56 लाख किमतीची टोयोटा फॉर्च्युनर परवानगीशिवाय घेऊन गेल्याप्रकरणी निगडी पोलिसांनी एका व्यावसायिकाविरुद्ध फसवणूक व चोरीचा गुन्हा दाखल केला आहे. या घटनेमुळे बँकिंग वर्तुळात खळबळ उडाली आहे.
याप्रकरणी संजय वासुदेव जोशी (वय 67, वारजे, पुणे) यांनी निगडी पोलीस ठाण्यात फिर्याद दिली आहे. त्यानुसार हसमुख राजाराम भाटी (वय 35, माणिकबाग, पुणे) याच्याविरुद्ध गुन्हा क्रमांक 520/2026 अंतर्गत भारतीय न्याय संहिता (बीएनएस) 2023 मधील कलम 303(2), 316, 317(2) आणि 318(2) अन्वये गुन्हा नोंदविण्यात आला आहे.
पोलिसांनी दिलेल्या माहितीनुसार, आरोपीची पत्नी पिंकी हसमुख भाटी यांनी टोयोटा फॉर्च्युनर खरेदीसाठी श्री गजानन लोकसेवा सहकारी बँकेकडून ₹42 लाखांचे वाहन कर्ज घेतले होते. मात्र, कर्जासाठी सादर करण्यात आलेली निवासी व व्यावसायिक मालमत्ता त्यांच्या मालकीची नसल्याचे बँकेच्या तपासात उघड झाले. त्यानंतर संबंधित फॉर्च्युनर वाहन सिंहगड पोलिसांच्या मदतीने जप्त करून बँकेच्या ताब्यात देण्यात आले होते.
फिर्यादीनुसार, 26 जून 2025 रोजी दुपारी सुमारे 1.30 वाजता बँकेच्या ताब्यात असलेली एमएच-12-XX-5929 क्रमांकाची फॉर्च्युनर आरोपीने बँकेची कोणतीही परवानगी न घेता, दिशाभूल करून आणि कथित लबाडीच्या हेतूने बँकेसमोरील रस्त्यावरून घेऊन गेला.
या प्रकरणी निगडी पोलिसांनी गुन्हा दाखल करून तपास सुरू केला आहे. आरोपीने वाहन नेमके कशा प्रकारे ताब्यात घेतले, तसेच सध्या ते वाहन कुठे आहे, याचा शोध पोलीस घेत आहेत.
