DakshTimes News Network
काशिनाथ शिंदे : मुंबई
विक्रोळी (पश्चिम) येथील राहुल नगर परिसरात मोठ्या आवाजात लावलेल्या संगीताच्या वादातून एका कुटुंबात रक्तरंजित हत्याकांड घडले. या हल्ल्यात सुनील विश्वकर्मा (वय ४०) आणि त्यांचा १४ वर्षीय मुलगा श्लोक विश्वकर्मा यांचा मृत्यू झाला, तर पत्नी अंजू विश्वकर्मा आणि धाकटा मुलगा विवान विश्वकर्मा गंभीर जखमी झाले आहेत.
बुधवारी (६ ऑगस्ट) पहाटे पार्कसाइट पोलीस ठाण्याच्या हद्दीतील राहुल नगर येथे ही धक्कादायक घटना घडली. प्राथमिक तपासानुसार, मोठ्या आवाजात सुरू असलेल्या संगीतावरून कुटुंबातील सदस्यांमध्ये जोरदार वाद झाला. वादाचे रूपांतर हाणामारीत होऊन आरोपींनी बुक्के, लाथा आणि चाकूने सपासप वार केल्याचे समोर आले आहे.
या हल्ल्यात गंभीर जखमी झालेल्या सुनील विश्वकर्मा आणि त्यांचा मुलगा श्लोक यांना तातडीने राजावाडी रुग्णालयात दाखल करण्यात आले. मात्र उपचारादरम्यान डॉक्टरांनी दोघांनाही मृत घोषित केले. अंजू विश्वकर्मा आणि विवान विश्वकर्मा यांच्यावर सध्या रुग्णालयात उपचार सुरू आहेत.
या प्रकरणी पार्कसाइट पोलिसांनी सुरेंद्र विश्वकर्मा आणि सूरज विश्वकर्मा या दोघांना ताब्यात घेतले असून त्यांची चौकशी सुरू आहे. घटनास्थळ सुरक्षित करून फॉरेन्सिक पथकाकडून तपास करण्यात आला आहे. या दुहेरी हत्येमागील नेमके कारण, घटनाक्रम आणि आरोपींचा सहभाग याचा सखोल तपास सुरू असल्याची माहिती पोलिसांनी दिली आहे.
