DakshTimes News Network
काशिनाथ शिंदे: थेरगाव
पिंपरी-चिंचवड महापालिकेच्या थेरगाव रुग्णालयात रुग्णाच्या नातेवाईकाला सुरक्षा रक्षकाने धक्काबुक्की करून गंभीर दुखापत केल्याची धक्कादायक घटना समोर आली आहे. या घटनेत तरुणाच्या डाव्या हाताचे हाड मोडल्याने काळेवाडी पोलिसांनी संबंधित सुरक्षा रक्षकाविरुद्ध गुन्हा दाखल केला आहे.
पोलिसांनी दिलेल्या माहितीनुसार, ही घटना २९ जुलै २०२६ रोजी सकाळी सुमारे ११.२० वाजण्याच्या सुमारास थेरगाव रुग्णालयाच्या तिसऱ्या मजल्यावरील जनरल मेडिसिन वॉर्डमध्ये घडली. फिर्यादी रमेश सुदाम भवाळ (वय २१, रा. मुकाई चौक, रावेत-किवळे) हे आजारी वडिलांच्या पलंगाशेजारी खाली झोपले होते. त्यावेळी ड्युटीवरील सुरक्षा रक्षकाने त्यांना उठवून वॉर्डच्या बाहेर जाण्यास सांगितले.
तक्रारीनुसार, रमेश भवाळ हे वॉर्डबाहेरील पॅसेजमधील बाकावर बसण्यासाठी जात असताना सुरक्षा रक्षक प्रकाश शिनगारे (वय ५५, रा. थेरगाव) यांनी मागून जोरात ओढून लोखंडी बाकावर ढकलले. या धक्क्यामुळे त्यांच्या डाव्या हाताच्या दंडाचे हाड मोडून गंभीर दुखापत झाली.
या प्रकरणी काळेवाडी पोलीस ठाण्यात भारतीय न्याय संहितेच्या कलम १२५(ब) अंतर्गत सुरक्षा रक्षक प्रकाश शिनगारे यांच्याविरुद्ध गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक शंतनू निबाळकर करत आहेत.
दरम्यान, या घटनेमुळे महापालिका रुग्णालयातील सुरक्षा व्यवस्थेवर प्रश्नचिन्ह निर्माण झाले असून, रुग्ण आणि त्यांच्या नातेवाईकांच्या सुरक्षिततेबाबत चिंता व्यक्त केली जात आहे. या प्रकरणाचा अधिक तपास सुरू आहे.
