DakshTimes News Network
आपत्ती व्यवस्थापन कायद्याच्या अंमलबजावणीवर केले संशोधन; पश्चिम महाराष्ट्रातील समस्या आणि आव्हानांचा घेतला वेध
काशिनाथ शिंदे
पिंपरी, पुणे : भारती विद्यापीठाच्या न्यू लॉ कॉलेज, पुणे येथील संशोधन केंद्राच्या मार्गदर्शनाखाली संशोधन पूर्ण करणाऱ्या प्रा. रुपाली पाटील यांना नुकतीच डॉक्टर ऑफ फिलॉसॉफी (पीएचडी) पदवी प्रदान करण्यात आली. त्यांच्या या शैक्षणिक यशाबद्दल विविध स्तरांतून त्यांचे अभिनंदन करण्यात येत आहे.
‘आपत्ती व्यवस्थापन कायद्याची अंमलबजावणी – पश्चिम महाराष्ट्राच्या विशेष संदर्भातील समस्या आणि आव्हाने‘ या विषयावर त्यांनी संशोधन प्रबंध सादर केला होता. आपत्ती व्यवस्थापन कायद्याची अंमलबजावणी करताना येणाऱ्या विविध अडचणी, समस्या आणि आव्हानांचा त्यांनी आपल्या संशोधनातून अभ्यास केला.
या संशोधनासाठी भारती विद्यापीठाच्या न्यू लॉ कॉलेज, पुणे येथील प्रा. डॉ. जयश्री खंदारे यांनी त्यांना मार्गदर्शन केले. तसेच न्यू लॉ कॉलेज, पुणेचे प्राचार्य, न्यू लॉ कॉलेज, सांगलीच्या प्राचार्य डॉ. पूजा नरवाडकर आणि यशवंतराव चव्हाण लॉ कॉलेज, कराडचे प्राचार्य डॉ. सतीश माने यांचे सहकार्य लाभले.
प्रा. रुपाली पाटील यांनी मिळवलेल्या या यशामुळे त्यांच्या शैक्षणिक आणि संशोधन क्षेत्रातील वाटचालीत महत्त्वपूर्ण टप्पा गाठला असून, त्यांच्या यशाबद्दल अभिनंदनाचा वर्षाव होत आहे.
