DakshTimes News Network
मृत महिलेचे वय अंदाजे २५ ते ३० वर्षे; अज्ञात आरोपीचा शोध सुरू, पोलीस उपनिरीक्षक भोजराज मिसाळ यांच्याकडे तपास
काशिनाथ शिंदे
मोशी: पिंपरी-चिंचवड शहरातील मोशी परिसरात एका अनोळखी महिलेचा खून झाल्याची धक्कादायक घटना उघडकीस आली आहे. मंत्रा मोमेंट हाउसिंग परिसरातील व्यावसायिक कार्यालयाच्या गाळा क्रमांक ७ जवळ या महिलेचा मृतदेह आढळून आला. या प्रकरणी भोसरी एमआयडीसी पोलीस ठाण्यात अज्ञात आरोपीविरोधात भारतीय न्याय संहितेच्या कलम १०३(१) अन्वये खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, १२ ऑक्टोबर २०२६ रोजी मध्यरात्री दोन वाजण्याच्या सुमारास या घटनेची माहिती डायल ११२ वरून मिळाली. त्यानंतर पोलीस घटनास्थळी दाखल झाले. तेथे अंदाजे २५ ते ३० वर्षे वयोगटातील एका महिलेचा मृतदेह आढळून आला.
मृत महिलेने भगव्या रंगाचा टी-शर्ट, त्यावर निळसर रंगाचे जॅकेट आणि काळसर व हिरव्या पट्ट्यांची ट्रॅक पँट परिधान केली होती. अज्ञात व्यक्तीने कोणत्यातरी कारणावरून हत्याराने वार करून गंभीर दुखापत केली आणि महिलेचा खून केल्याची तक्रार पोलिसांकडे दाखल झाली आहे. त्यानुसार अज्ञात आरोपीविरोधात गुन्हा नोंदविण्यात आला आहे.
मृत महिलेची ओळख पटविण्याचे आव्हान
या घटनेनंतर पोलिसांसमोर मृत महिलेची ओळख पटविणे आणि खुनातील आरोपीचा शोध घेणे, ही प्रमुख आव्हाने आहेत. खुनामागील नेमके कारण अद्याप स्पष्ट झालेले नाही. या प्रकरणाचा पुढील तपास भोसरी एमआयडीसी पोलीस ठाण्याचे पोलीस उपनिरीक्षक भोजराज मिसाळ करीत आहेत. तपासातून या घटनेबाबत अधिक माहिती समोर येण्याची शक्यता आहे.
