चिमुकल्यांच्या कल्पकतेतून साकारला दिवाळीचा दीपोत्सव!

कागदी दिवे, आकर्षक आकाशकंदील अन् पणत्यांच्या निर्मितीतून ‘द लर्निंग नेक्स्ट’च्या विद्यार्थ्यांनी फुलविला सर्जनशीलतेचा प्रकाश

काशिनाथ शिंदे

पिंपरी : दिवाळीचा सण म्हणजे आनंद, उत्साह आणि प्रकाशाचा उत्सव! हा आनंद केवळ फटाके आणि फराळापुरता मर्यादित न ठेवता स्वतःच्या कल्पकतेतून सणाचा उत्साह द्विगुणित करण्याचा सुंदर प्रयत्न चिखलीतील मोरेवस्ती येथील ‘द लर्निंग नेक्स्ट’ संस्थेच्या चिमुकल्या विद्यार्थ्यांनी केला.

दिवाळीनिमित्त आयोजित विशेष उपक्रमात नर्सरी, एलकेजी आणि यूकेजीच्या विद्यार्थ्यांनी आपल्या बालसुलभ कल्पनाशक्तीला कलात्मक रूप देत रंगीबेरंगी कागदी दिवे, आकर्षक आकाशकंदील, क्राफ्ट पेपरपासून सुंदर पणत्या आणि दीपोत्सवाची मनमोहक चित्रे साकारली. चिमुकल्यांनी स्वतःच्या हातांनी तयार केलेल्या या कलाकृतींमुळे परिसरात जणू सर्जनशीलतेचा दीपोत्सवच फुलला.

संस्थेच्या संस्थापक अध्यक्षा संजीवनी जाधव यांच्या मार्गदर्शनाखाली हा उपक्रम उत्साहात पार पडला. विद्यार्थ्यांनी उत्स्फूर्त सहभाग घेत विविध कलाकृती तयार केल्या. आपल्या हातांनी साकारलेल्या कलाकृती पाहून चिमुकल्यांच्या चेहऱ्यावर आनंद ओसंडून वाहत होता.

या उपक्रमामुळे विद्यार्थ्यांना कलानिर्मितीचा आनंद मिळण्यासोबतच त्यांच्यातील सर्जनशीलता, कल्पकता आणि स्वहस्ते काहीतरी घडविण्याचा आत्मविश्वास वाढण्यास मदत झाली. लहान वयातच मुलांच्या कलागुणांना वाव देणे आणि त्यांच्यातील सुप्त कौशल्य विकसित करणे हा या उपक्रमामागील उद्देश असल्याचे संस्थेच्या संस्थापक अध्यक्षा संजीवनी जाधव यांनी सांगितले.

दरम्यान, आपल्या पाल्यांनी स्वतःच्या कल्पकतेतून तयार केलेल्या सुंदर कलाकृती पाहून पालकांनीही समाधान व्यक्त केले. चिमुकल्यांच्या या अनोख्या दीपोत्सवाने दिवाळीच्या आनंदात सर्जनशीलतेची अनोखी भर घातली.