DakshTimes News Network
रात्रीच्या सिंचनाची कटकट कमी होणार; उपमुख्यमंत्री सुनेत्राताई पवार यांच्या हस्ते ५ मेगावॅट प्रकल्पाचे लोकार्पण
काशिनाथ शिंदे
पुणे : शेतीच्या विकासासाठी सिंचनासोबतच दिवसा आणि पुरेशा दाबाने वीज उपलब्ध होणे आवश्यक आहे. शेतकऱ्यांना दिवसा वीज मिळाल्यास शेतीचे नियोजन अधिक सुलभ होऊन त्यांच्या जीवनमानात सकारात्मक बदल घडण्यास मदत होईल. मुख्यमंत्री सौर कृषी वाहिनी योजनेंतर्गत उभारण्यात येणारे सौरऊर्जा प्रकल्प शेतकऱ्यांसाठी महत्त्वपूर्ण ठरणार आहेत, असे प्रतिपादन उपमुख्यमंत्री सुनेत्राताई पवार यांनी केले.
खेड तालुक्यातील पानमंदवाडी येथे मुख्यमंत्री सौर कृषी वाहिनी योजना २.० अंतर्गत उभारण्यात आलेल्या ५ मेगावॅट क्षमतेच्या सौरऊर्जा प्रकल्पाचे लोकार्पण बुधवारी (दि. ४) उपमुख्यमंत्री सुनेत्राताई पवार यांच्या हस्ते दूरदृश्य प्रणालीद्वारे करण्यात आले. चाकण येथे राजगुरुनगर सहकारी बँकेच्या २० व्या शाखेच्या उद्घाटनप्रसंगी हा कार्यक्रम झाला. या प्रकल्पामुळे कडूस वीज उपकेंद्रांतर्गत येणाऱ्या २ हजार ५०४ शेतकऱ्यांना दिवसा वीज उपलब्ध होणार आहे.
शेतीसाठी दिवसा वीज मिळाल्याने शेतकऱ्यांना सिंचनाचे नियोजन करणे सोयीचे होणार आहे. रात्रीच्या वेळी शेतात जाऊन पिकांना पाणी देण्याची गरज कमी होणार असल्याने बिबट्या आणि अन्य वन्यप्राण्यांपासून होणारा संभाव्य धोका टाळण्यासही मदत होईल. राज्यभरात विकेंद्रित स्वरूपात सौरऊर्जा प्रकल्प उभारून शेतीसाठी दिवसा वीज उपलब्ध करून देण्याचे काम शासनाकडून सुरू असल्याचे पवार यांनी सांगितले.
पानमंदवाडी येथील या प्रकल्पाची उभारणी अवाडा कंपनीने केली असून, त्यासाठी सुमारे २० कोटी ७५ लाख रुपये खर्च करण्यात आला आहे. प्रकल्पात निर्माण होणारी वीज ५.८ किलोमीटर लांबीच्या ११ केव्ही वाहिनीद्वारे ३३ केव्ही कडूस उपकेंद्रापर्यंत पोहोचविण्यात येणार आहे. स्थानिक पातळीवर सौरऊर्जेची निर्मिती करून तिचा उपयोग शेतीपंपांसाठी केला जाणार आहे.
कडूस उपकेंद्रांतर्गत एकूण ८ हजार ६४३ वीजग्राहक असून, त्यापैकी २ हजार ५०४ कृषी ग्राहक आहेत. वाढत्या विजेच्या मागणीचा विचार करून उपकेंद्रात ५ एमव्हीए क्षमतेचे अतिरिक्त उच्चदाब रोहित्र बसविण्याचे काम सुरू आहे. हे काम पूर्ण झाल्यानंतर उपकेंद्राची एकूण क्षमता १५ एमव्हीए होणार आहे.
यावेळी आमदार बाबाजी काळे, माजी आमदार दिलीपअण्णा मोहिते पाटील, चाकण नगरपरिषदेच्या नगराध्यक्षा मनिषा गोरे उपस्थित होत्या. महावितरणतर्फे पुणे परिमंडलाचे मुख्य अभियंता ज्ञानदेव पडळकर, पुणे ग्रामीण मंडळाचे अधीक्षक अभियंता सुरेश सवाईराम, कार्यकारी अभियंता केशव काळुमाळी, तसेच अवाडाचे फतेह सिंग आणि मुर्तुजा काझी यांच्यासह पंचक्रोशीतील नागरिक उपस्थित होते.
