DakshTimes News Network
राज्यस्तरीय ‘इंद्रधनुष्य’ स्पर्धेसाठी तीन विद्यार्थ्यांची निवड
काशिनाथ शिंदे
पिंपरी : आंतरमहाविद्यालयीन सांस्कृतिक स्पर्धेत पिंपरी चिंचवड अभियांत्रिकी महाविद्यालयाच्या (पीसीसीओई) विद्यार्थ्यांनी आपल्या कलागुणांची चमक दाखवत घवघवीत यश संपादन केले. संगमनेर येथे आयोजित ‘जल्लोष २०२६’ या सांस्कृतिक स्पर्धेत महाविद्यालयाने तीन पारितोषिके पटकावली. विशेष म्हणजे, या तिन्ही विजेत्या विद्यार्थ्यांची राज्यस्तरीय ‘इंद्रधनुष्य’ स्पर्धेसाठी निवड झाली आहे.
सावित्रीबाई फुले पुणे विद्यापीठाच्या विद्यार्थी विकास मंडळ आणि संगमनेर येथील शिक्षण प्रसारक संस्था, कॉलेज ऑफ एज्युकेशन यांच्या संयुक्त विद्यमाने या आंतरमहाविद्यालयीन स्पर्धेचे आयोजन करण्यात आले होते.
या स्पर्धेत भारतीय शास्त्रीय गायन प्रकारात सानिया मुंगारे हिने प्रथम क्रमांक, व्यंगचित्र स्पर्धेत जयदीप वाकडे याने द्वितीय क्रमांक, तर रांगोळी स्पर्धेत चंचल वर्मा हिने तृतीय क्रमांक पटकावला. या तिन्ही विद्यार्थ्यांनी आपल्या कलात्मक कौशल्याच्या जोरावर महाविद्यालयाचा नावलौकिक उंचावला.
या यशाबद्दल पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई, पीसीसीओईचे संचालक डॉ. गोविंद कुलकर्णी, उपसंचालक डॉ. नीलकंठ चोपडे, अधिव्याख्याते डॉ. पद्माकर देशमुख आणि उपअधिव्याख्याते डॉ. राजेश फुरसुले यांनी आर्ट सर्कलच्या संघाचे तसेच मार्गदर्शकांचे अभिनंदन केले. राज्यस्तरीय स्पर्धेसाठी निवड झालेल्या विद्यार्थ्यांना त्यांनी पुढील वाटचालीस शुभेच्छा दिल्या.
महाविद्यालयाचे सांस्कृतिक समन्वयक डॉ. मसनाजी नुकुलवार यांनी विद्यार्थ्यांना मार्गदर्शन केले.
