पहिल्याच दिवशी पुणे मेट्रोला प्रवाशांचा ‘५० हजारांचा’ प्रतिसाद!

दिवाळीच्या सुट्ट्यांमध्येही मेट्रोला पसंती; जिल्हा न्यायालय स्थानकावर सर्वाधिक गर्दी, गर्दीच्या वेळेत दर पाच मिनिटांनी धावणार मेट्रो

पुणे : माण-हिंजवडी ते शिवाजीनगर या महत्त्वाकांक्षी मेट्रो मार्गाला पहिल्याच दिवशी प्रवाशांचा उत्स्फूर्त प्रतिसाद मिळाला आहे. बुधवारी (४ नोव्हेंबर) प्रवासी सेवा सुरू झाल्यानंतर पहिल्याच दिवशी तब्बल ५० हजार नागरिकांनी मेट्रोतून प्रवास केला. विशेष म्हणजे, दिवाळीच्या सुट्ट्यांमुळे शहरातील बहुतांश कार्यालये आणि व्यावसायिक आस्थापने बंद असतानाही प्रवाशांनी मेट्रोला पसंती दिली. त्यामुळे नियमित कामकाज सुरू झाल्यानंतर प्रवासी संख्येत मोठी वाढ होण्याची शक्यता व्यक्त केली जात आहे.

या मार्गावर जिल्हा न्यायालय मेट्रो स्थानक प्रवाशांच्या पसंतीत अव्वल ठरले. या स्थानकावरून दिवसभरात सुमारे २५ हजार प्रवाशांनी प्रवास केला. पुणे रेल्वे स्थानकासह शहरातील विविध भागांना जोडणारे महत्त्वाचे केंद्र असल्याने या स्थानकावर दिवसभर प्रवाशांची मोठी वर्दळ होती.

पुणे आयटी सिटी मेट्रो रेल लिमिटेडचे मुख्य कार्यकारी अधिकारी अनिल कुमार सैनी यांनी पहिल्या दिवसाच्या प्रतिसादाबद्दल समाधान व्यक्त केले. मेट्रोची जोडणी व्यवस्था, आरामदायी प्रवास आणि कमी वेळेत इच्छित स्थळी पोहोचण्याची सुविधा नागरिकांना पसंत पडत असल्याचे त्यांनी सांगितले. पुणेकरांना सुरक्षित आणि आरामदायी प्रवासाचा अनुभव देण्यासाठी प्रयत्न सुरू राहतील, असेही त्यांनी स्पष्ट केले.

दरम्यान, दिवाळीच्या सुट्ट्या संपल्यानंतर पुढील दोन आठवड्यांत कार्यालये आणि व्यावसायिक आस्थापने पूर्ण क्षमतेने सुरू होतील. त्यामुळे संभाव्य गर्दी लक्षात घेऊन मेट्रोच्या फेऱ्यांमध्ये वाढ करण्याचे नियोजन करण्यात आले आहे. गर्दीच्या वेळेत दर पाच मिनिटांनी, तर कमी गर्दीच्या वेळेत दर आठ मिनिटांनी मेट्रो धावणार आहे. हिंजवडी ते शिवाजीनगर हा संपूर्ण प्रवास अवघ्या ४० मिनिटांत पूर्ण होणार असल्याने विशेषतः आयटी क्षेत्रातील कर्मचारी आणि नियमित प्रवाशांना मोठा दिलासा मिळणार आहे.

एनसीएमसी कार्डलाही पसंती

मेट्रोच्या नॅशनल कॉमन मोबिलिटी कार्ड (एनसीएमसी) सुविधेलाही पहिल्याच दिवशी चांगला प्रतिसाद मिळाला. एकाच कार्डच्या माध्यमातून पुणे मेट्रोच्या सर्व मार्गांवर प्रवास करता येत असल्याने प्रवाशांसाठी ही सुविधा सोयीची ठरत आहे.

याशिवाय प्रवाशांच्या मागणीनुसार मेट्रोतून सायकली नेण्याची सुविधाही उपलब्ध करून देण्यात आली आहे. त्यामुळे मेट्रो आणि सायकलचा एकत्रित वापर करून अंतिम टप्प्यातील प्रवास अधिक सुलभ होणार आहे. पर्यावरणपूरक वाहतुकीला प्रोत्साहन देण्याच्या दृष्टीनेही हा उपक्रम महत्त्वाचा मानला जात आहे.

पहिल्याच दिवशी मिळालेल्या ५० हजार प्रवाशांच्या प्रतिसादामुळे पुणे मेट्रो लाइन ३ ची सुरुवात आशादायक ठरली आहे. वाढीव फेऱ्या, आधुनिक प्रवासी सुविधा आणि शहरातील महत्त्वाच्या भागांना जोडणारी वाहतूक व्यवस्था यामुळे आगामी काळात ही मेट्रो पुणेकरांच्या दैनंदिन प्रवासाचा महत्त्वाचा आधार ठरणार असल्याचे चित्र आहे.