पहिल्याच दिवशी पुणे मेट्रोची धडाकेबाज सुरुवात! ५० हजार प्रवाशांचा प्रवास

दिवाळीच्या सुट्ट्यांमध्येही मेट्रोला मोठी पसंती; गर्दीच्या वेळी दर पाच मिनिटांनी धावणार, एनसीएमसी कार्ड सुविधेलाही प्रतिसाद

काशिनाथ शिंदे

पुणे : माण-हिंजवडी ते शिवाजीनगर या महत्त्वाकांक्षी मेट्रो मार्गाने प्रवासी सेवेला सुरुवात करताच पहिल्याच दिवशी जोरदार मुसंडी मारली आहे. बुधवारी (४ नोव्हेंबर) तब्बल ५० हजार प्रवाशांनी या मार्गावरून प्रवास केला. विशेष म्हणजे दिवाळीच्या सुट्ट्यांमुळे शहरातील बहुतांश कार्यालये आणि व्यावसायिक आस्थापने बंद असतानाही मेट्रोला मिळालेला प्रतिसाद लक्षणीय ठरला आहे. त्यामुळे नियमित कामकाज सुरू झाल्यानंतर प्रवासी संख्येत मोठी वाढ होण्याची शक्यता व्यक्त केली जात आहे.

जिल्हा न्यायालय स्थानक ठरले प्रवाशांचे केंद्रबिंदू!

या मार्गावर जिल्हा न्यायालय मेट्रो स्थानक प्रवाशांच्या सर्वाधिक पसंतीचे ठरले. दिवसभरात सुमारे २५ हजार प्रवाशांनी या स्थानकाचा वापर केला. पुणे रेल्वे स्थानकासह शहरातील विविध भागांना जोडणारे महत्त्वाचे केंद्र असल्याने येथे दिवसभर प्रवाशांची मोठी वर्दळ पाहायला मिळाली.

पुणे आयटी सिटी मेट्रो रेल लिमिटेडचे मुख्य कार्यकारी अधिकारी अनिल कुमार सैनी यांनी पहिल्याच दिवशी मिळालेल्या प्रतिसादाबद्दल समाधान व्यक्त केले. मेट्रोची उत्तम जोडणी, आरामदायी प्रवास आणि कमी वेळेत इच्छितस्थळी पोहोचण्याची सुविधा नागरिकांच्या पसंतीस उतरल्याचे त्यांनी सांगितले. पुणेकरांना सुरक्षित आणि आरामदायी प्रवासाचा अनुभव देण्यासाठी सातत्याने प्रयत्न केले जातील, असेही त्यांनी स्पष्ट केले.

गर्दीच्या वेळेत दर पाच मिनिटांनी मेट्रो!

दिवाळीनंतर कार्यालये आणि व्यावसायिक आस्थापनांचे नियमित कामकाज सुरू झाल्यावर संभाव्य गर्दी लक्षात घेऊन मेट्रोच्या फेऱ्यांमध्ये वाढ करण्यात येणार आहे. गर्दीच्या वेळेत दर पाच मिनिटांनी, तर गर्दी कमी असलेल्या वेळेत दर आठ मिनिटांनी मेट्रो धावणार आहे. हिंजवडी ते शिवाजीनगर हा संपूर्ण प्रवास अवघ्या ४० मिनिटांत पूर्ण होणार असल्याने विशेषतः आयटी क्षेत्रातील कर्मचारी आणि नियमित प्रवाशांना मोठा दिलासा मिळणार आहे.

एका कार्डवर सर्व मार्गांचा प्रवास!

नॅशनल कॉमन मोबिलिटी कार्ड (एनसीएमसी) सुविधेलाही पहिल्याच दिवशी चांगला प्रतिसाद मिळाला. एकाच कार्डच्या माध्यमातून पुणे मेट्रोच्या सर्व मार्गांवर प्रवास करता येत असल्याने प्रवाशांनी या सुविधेला पसंती दिली आहे.

याशिवाय प्रवाशांच्या मागणीनुसार मेट्रोमधून सायकल नेण्याची सुविधाही उपलब्ध करून देण्यात आली आहे. त्यामुळे मेट्रो आणि सायकलचा एकत्रित वापर करून अंतिम ठिकाणापर्यंत पोहोचणे अधिक सोयीचे होणार आहे. सार्वजनिक वाहतुकीला पर्यावरणपूरक प्रवासाची जोड देण्याच्या दृष्टीने हा महत्त्वाचा उपक्रम ठरणार आहे.

पहिल्याच दिवशी ५० हजार प्रवाशांचा प्रतिसाद मिळाल्याने पुणे मेट्रो लाइन ३ ची दमदार सुरुवात झाली आहे. वाढीव फेऱ्या, आधुनिक प्रवासी सुविधा आणि शहरातील महत्त्वाच्या भागांना जोडणारी कनेक्टिव्हिटी यामुळे आगामी काळात ही मेट्रो पुणेकरांच्या दैनंदिन प्रवासाचा कणा ठरण्याची चिन्हे दिसू लागली आहेत.