DakshTimes News Network
३१ डिसेंबरपर्यंत मुदतवाढ; ग्रामपंचायत स्तरावर विशेष शिबिरे घेऊन कार्ड नोंदणी व वितरणाचे एसटी महामंडळाचे निर्देश
काशिनाथ शिंदे
पुणे : राज्य परिवहन महामंडळाच्या बसमधून प्रवास करणाऱ्या महिला प्रवाशांसाठी सवलतीचे तिकीट मिळवताना आवश्यक करण्यात आलेल्या एनसीएमसी (NCMC) कार्डच्या सक्तीला तूर्तास शिथिलता देण्यात आली आहे. महिला प्रवाशांची मोठी संख्या, कार्ड नोंदणी व वितरणातील अडचणी आणि ग्रामीण भागातील महिलांमध्ये असलेली माहितीची कमतरता लक्षात घेऊन एसटी महामंडळाने हा महत्त्वपूर्ण निर्णय घेतला आहे. त्यानुसार एनसीएमसी कार्डची अनिवार्यता ३१ डिसेंबर २०२६ पर्यंत शिथिल करण्यात येणार आहे.
एसटी महामंडळाच्या वाहतूक विभागाने ४ नोव्हेंबर २०२६ रोजी यासंदर्भातील परिपत्रक जारी केले आहे. यापूर्वी १ ऑक्टोबर २०२६ पासून ज्येष्ठ नागरिक तसेच महिला प्रवाशांना सवलतीचे तिकीट मिळवण्यासाठी एनसीएमसी कार्ड अनिवार्य करण्यात आले होते. मात्र, महिला लाभार्थ्यांची मोठी संख्या पाहता अद्याप अपेक्षित प्रमाणात कार्ड नोंदणी व वितरण झालेले नसल्याचे निदर्शनास आले आहे.
महिला लाभार्थ्यांसाठी आतापर्यंत केवळ १.१० कोटी एनसीएमसी कार्डची नोंदणी अथवा वितरण झाले आहे. विशेषतः ग्रामीण आणि खेड्यापाड्यातील अनेक महिलांपर्यंत या योजनेची माहिती पोहोचलेली नसल्याने मोठ्या प्रमाणावर नोंदणी बाकी असल्याचे महामंडळाच्या निदर्शनास आले आहे. त्यामुळे महिला प्रवाशांना एसटीच्या सवलतीपासून वंचित राहावे लागू नये, यासाठी कार्डची अनिवार्यता ३१ डिसेंबर २०२६ पर्यंत शिथिल करण्याचा निर्णय घेण्यात आला आहे.
दरम्यान, या कालावधीत सर्व महिला लाभार्थ्यांनी एनसीएमसी कार्डची नोंदणी करून घ्यावी, असे आवाहन करण्यात आले आहे. यासाठी संबंधित विभाग नियंत्रकांना ग्रामपंचायत स्तरावर विशेष शिबिरे आयोजित करण्याचे निर्देश देण्यात आले आहेत. ग्रामपंचायत सरपंच, स्थानिक लोकप्रतिनिधी, प्रवासी संघटना आणि ग्रामपंचायत पदाधिकाऱ्यांच्या सक्रिय सहभागातून ही शिबिरे राबविण्यात येणार आहेत.
या मोहिमेंतर्गत ३१ डिसेंबर २०२६ अखेरपर्यंत १०० टक्के एनसीएमसी कार्ड नोंदणी व वितरण पूर्ण करण्याचे उद्दिष्ट ठेवण्यात आले आहे. त्यामुळे महिला प्रवाशांना मोठा दिलासा मिळाला असून, ग्रामीण भागातील महिलांनी या संधीचा लाभ घेऊन लवकरात लवकर कार्ड नोंदणी करून घ्यावी, असे आवाहन एसटी महामंडळाकडून करण्यात आले आहे.
