DakshTimes News Network
आमदार अमित गोरखे, विरोधी पक्षनेते भाऊसाहेब भोईर यांच्यासह मान्यवरांची उपस्थिती; आधुनिक भारताच्या उभारणीतील नेहरूंच्या योगदानाचे स्मरण
काशिनाथ शिंदे
पिंपरी: स्वतंत्र भारताचे पहिले पंतप्रधान आणि भारतरत्न पंडित जवाहरलाल नेहरू यांच्या जयंतीनिमित्त पिंपरी-चिंचवड महानगरपालिकेच्या वतीने अभिवादन करण्यात आले. यानिमित्त महापालिकेतील त्यांच्या प्रतिमेस तसेच नेहरूनगर येथील पुतळ्यास उपमहापौर शर्मिला बाबर यांच्या हस्ते पुष्पहार अर्पण करून आदरांजली वाहण्यात आली.
या वेळी आमदार अमित गोरखे, विरोधी पक्षनेते भाऊसाहेब भोईर, नगरसदस्य राहुल भोसले, नगरसेविका अनुराधा गोरखे, सुप्रिया चांदगुडे, जनता संपर्क अधिकारी प्रफुल्ल पुराणिक, सामाजिक कार्यकर्ते संदीपान झोंबाडे, नेताजी शिंदे, युवराज दाखले, नितीन घोलप, बाबासाहेब राठोड, उषामाई वाघमारे यांच्यासह महापालिकेचे विविध विभागांचे प्रशासकीय अधिकारी व कर्मचारी उपस्थित होते.
पंडित जवाहरलाल नेहरू यांनी भारतीय स्वातंत्र्यलढ्यात सक्रिय सहभाग नोंदवत देशाच्या स्वातंत्र्यासाठी मोलाचे योगदान दिले. स्वातंत्र्यानंतर देशाची लोकशाही व्यवस्था मजबूत करण्याबरोबरच शिक्षण, विज्ञान, उद्योग आणि पायाभूत सुविधांच्या विकासाचा भक्कम पाया घालण्यात त्यांनी महत्त्वपूर्ण भूमिका बजावली. आधुनिक भारताच्या उभारणीत त्यांनी दिलेले योगदान देशाच्या इतिहासात सदैव स्मरणात राहील, अशा भावना यावेळी व्यक्त करण्यात आल्या.
