DakshTimes News Network
उपमहापौर शर्मिला बाबर, विरोधी पक्षनेते भाऊसाहेब भोईर यांच्या हस्ते प्रतिमेस पुष्पहार अर्पण
काशिनाथ शिंदे
पिंपरी : भारतीय स्वातंत्र्यलढ्यात इंग्रजांविरोधात सशस्त्र उठाव करून ब्रिटिश सत्तेला आव्हान देणारे थोर आदिवासी क्रांतिकारक बिरसा मुंडा यांच्या जयंतीनिमित्त पिंपरी-चिंचवड महापालिकेच्या वतीने अभिवादन करण्यात आले. पिंपरी येथील महापालिकेच्या मुख्य प्रशासकीय इमारतीत बिरसा मुंडा यांच्या प्रतिमेस उपमहापौर शर्मिला बाबर आणि विरोधी पक्षनेते भाऊसाहेब भोईर यांच्या हस्ते पुष्पहार अर्पण करून अभिवादन करण्यात आले.
यावेळी नगरसदस्य कृष्णा सुरकुले, माजी नगरसदस्या उषा मुंढे, जनता संपर्क अधिकारी प्रफुल्ल पुराणिक, वाहनचालक संतोष खामकर, विद्युत विभागाचे विष्णू गवारे, सामाजिक कार्यकर्ते पांडुरंग परचंडराव, दत्तात्रय कोकाटे आदी उपस्थित होते.
यावेळी बोलताना उपमहापौर शर्मिला बाबर म्हणाल्या की, लहानपणापासूनच देशभक्तीची प्रेरणा असलेल्या बिरसा मुंडा यांनी इंग्रजांच्या अन्यायकारक सत्तेविरोधात बंड पुकारले. हजारो क्रांतिकारकांना संघटित करून पारंपरिक धनुष्यबाण आणि तीर-कमठ्यांच्या साहाय्याने त्यांनी ब्रिटिशांविरोधात लढा उभारला. त्यांचा हा संघर्ष भारतीय स्वातंत्र्यलढ्याच्या इतिहासात सुवर्णाक्षरांनी नोंदविण्यासारखा आहे. त्यांच्या प्रखर देशभक्तीचा, धैर्याचा आणि संघर्षशील वृत्तीचा आदर्श भावी पिढीने घ्यावा, असे आवाहनही त्यांनी केले.
