DakshTimes News Network
४.९२ लाखांचे २४.६३ ग्रॅम मॅफेड्रॉन हस्तगत; रिक्षा, मोबाइल आणि रोख रकमेसह ७ लाखांचा मुद्देमाल जप्त
काशिनाथ शिंदे
पुणे : गुलटेकडी येथील मार्केटयार्ड परिसरात अमली पदार्थविरोधी पथक क्रमांक २ ने धडक कारवाई करत मॅफेड्रॉन (एमडी) विक्रीच्या संशयावरून तिघांना ताब्यात घेतले. त्यांच्याकडून ४ लाख ९२ हजार ६०० रुपये किमतीचे २४.६३ ग्रॅम मॅफेड्रॉन जप्त करण्यात आले. तसेच मोबाइल फोन, रिक्षा आणि रोख रकमेसह एकूण ७ लाख ५ हजार ४२९ रुपयांचा मुद्देमाल पोलिसांनी हस्तगत केला. याप्रकरणी मार्केटयार्ड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, शनिवारी वरिष्ठ पोलीस निरीक्षक जीवन माने आणि सहायक पोलीस निरीक्षक अफरोज पठाण यांचे पथक मार्केटयार्ड पोलीस ठाण्याच्या हद्दीत गस्त घालत होते. यावेळी उत्सव समिती चौकातून गंगाधामकडे जाणाऱ्या रस्त्यावर, वारणा सहकारी बँकेच्या इमारतीलगत कृषी उत्पन्न बाजार समितीच्या प्रवेशद्वारासमोर काळ्या-पिवळ्या रंगाच्या रिक्षामध्ये तिघे संशयास्पदरीत्या बसलेले आढळले.
पोलिसांनी तत्काळ तिघांना ताब्यात घेऊन दोन पंचांसमक्ष झडती घेतली. त्यावेळी त्यांच्याकडे २४.६३ ग्रॅम मॅफेड्रॉन आढळून आले.
सुभाषगौडा गुरता चौधरी (वय ३२), बाप्पू भीमा बाळशंकर (वय २८) आणि शाहरुख मेहबूब खान (वय २८), अशी ताब्यात घेतलेल्या तिघांची नावे आहेत. हे तिघेही मार्केटयार्ड येथील आंबेडकरनगर परिसरातील रहिवासी आहेत.
या कारवाईत मॅफेड्रॉनसह मोबाइल फोन, बजाज रिक्षा आणि रोख रक्कम असा एकूण ७ लाख ५ हजार ४२९ रुपयांचा मुद्देमाल जप्त करण्यात आला.
पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त (गुन्हे) तेजस्वी सातपुते, पोलीस उपायुक्त (गुन्हे) गौहर हसन आणि सहायक पोलीस आयुक्त (गुन्हे-३) शंकर खटके यांच्या मार्गदर्शनाखाली ही कारवाई करण्यात आली.
या पथकात वरिष्ठ पोलीस निरीक्षक जीवन माने, सहायक पोलीस निरीक्षक अफरोज पठाण यांच्यासह अमोल जगताप, सतीश चव्हाण, शरद धांडे, संदीप देवकाते, योगेश मांढरे, योगेश कुंभार, सुरेखा साबळे, जानवी सूर्यवंशी, सुकेशिनी आंबले आणि अजिंक्य जोजारे यांनी सहभाग घेतला.
