३.९१५ किलो गांजासह दुचाकी, मोबाईल जप्त
पिंपरी, काशिनाथ शिंदे : पिंपरी-चिंचवड पोलिसांच्या अंमली पदार्थ विरोधी पथकाने काळेवाडी परिसरात धडक कारवाई करत एका गांजा विक्रेत्याला अटक केली. आरोपीकडून ३ किलो ९१५ ग्रॅम गांजा, एक मोबाईल फोन आणि एक दुचाकी असा एकूण ३ लाख ३० हजार ७५० रुपयांचा मुद्देमाल जप्त करण्यात आला आहे.
अटक करण्यात आलेल्या आरोपीचे नाव अशोक संतोष आडवाणी (वय २८, रा. पवनेश्वर कॉलनी, थेरगाव, पुणे) असे आहे. पोलिसांना मिळालेल्या गुप्त माहितीच्या आधारे २७ मे रोजी सायंकाळी थेरगाव स्मशानभूमीजवळील लाकूड वखारीसमोर सापळा रचण्यात आला. संशयिताची झडती घेतली असता त्याच्याकडे गांजा आढळून आला. त्यानंतर त्याला ताब्यात घेऊन मुद्देमाल जप्त करण्यात आला.
या प्रकरणी काळेवाडी पोलीस ठाण्यात एनडीपीएस कायद्यान्वये कलम ८(क), २०(ब)(ii)(ब) व २९ अन्वये गुन्हा दाखल करण्यात आला असून पुढील तपास सुरू आहे.
ही कारवाई पोलीस आयुक्त विनयकुमार चौबे, सहपोलीस आयुक्त शशिकांत महावरकर, अपर पोलीस आयुक्त सारंग आवाड, पोलीस उपायुक्त (गुन्हे) प्रदीप जाधव आणि सहायक पोलीस आयुक्त (गुन्हे-२) प्रवीण मोरे यांच्या मार्गदर्शनाखाली करण्यात आली.
कारवाईत अंमली पदार्थ विरोधी पथकाचे वरिष्ठ पोलीस निरीक्षक महेश पाटील, सपोनि स्वप्नील चव्हाण, पोउपनि जिलानी मोमीन, महिला पोलीस हवालदार सुषमा पाटील, पोलीस शिपाई सदानंद रुद्राक्षे, गोविंद डोके, कपिलेश इंगवे, सुभाष गुरव यांनी सहभाग घेतला. तर तांत्रिक विश्लेषणासाठी पोलीस शिपाई सुभाष गुरव यांनी विशेष मदत केली.
अंमली पदार्थांच्या अवैध विक्रीविरोधात पिंपरी-चिंचवड पोलिसांनी सुरू केलेल्या मोहिमेअंतर्गत ही आणखी एक महत्त्वपूर्ण कारवाई मानली जात असून, अशा कारवाया यापुढेही सुरू राहणार असल्याचा इशारा पोलिसांनी दिला आहे.
About the Author
