DakshTimes News Network
काशिनाथ शिंदे : पिंपरी चिंचवड
पिंपरी : मोशी येथील कचरा डेपोत मृत्युमुखी पडलेल्या कामगारांना न्याय मिळावा आणि या प्रकरणातील संबंधित अधिकाऱ्यांवर सदोष मनुष्यवधाचे गुन्हे दाखल करावेत, या मागणीसाठी शिवसेना उबाठा, मनसे, काँग्रेस तसेच विविध संघटनांच्या वतीने पिंपरी-चिंचवड महापालिकेच्या यशवंतराव चव्हाण सभागृहाबाहेर ठिय्या आंदोलन करण्यात आले.
आंदोलनादरम्यान महापालिका प्रशासनाविरोधात जोरदार घोषणाबाजी करण्यात आली. पर्यावरण अभियंता संजय कुलकर्णी, महापौर रवी लांडगे आणि आयुक्त विजय सूर्यवंशी यांच्यावर कारवाई करण्याची मागणी आंदोलकांनी केली. सुमारे दोन तास हे आंदोलन सुरू होते.
महापौर रवी लांडगे यांनी संबंधित प्रकरणात कारवाई करण्याचे आश्वासन दिल्यानंतर आंदोलन तात्पुरते स्थगित करण्यात आले. मात्र, आंदोलन स्थगित झाल्यानंतरही महापालिका प्रवेशद्वारावर घोषणाबाजी करण्यात आली. तसेच पिंपरी, चिंचवड आणि भोसरी विधानसभा मतदारसंघातील आमदार तसेच विधान परिषद सदस्यांच्या नावानेही घोषणा देण्यात आल्या.
या आंदोलनात मनसेचे शहराध्यक्ष सचिन चिखले, सागर बहुले, रुपेश पटेकर, बाळा दानवले, शिवसेना उबाठाचे चेतन पवार, काँग्रेसचे नरेंद्र बनसोडे आणि सामाजिक कार्यकर्ते मानव कांबळे यांच्यासह विविध पदाधिकारी व कार्यकर्ते सहभागी झाले होते. मृत कामगारांच्या कुटुंबीयांना न्याय मिळेपर्यंत पाठपुरावा सुरू ठेवणार असल्याचे आंदोलकांनी सांगितले.
