Oplus_131072
काशिनाथ शिंदे: पिंपरी चिंचवड
पिंपरी-चिंचवड पोलीस आयुक्तालयाच्या गुन्हे शाखा युनिट-३ने तडीपार आरोपींविरुद्ध सुरू असलेल्या विशेष मोहिमेत आणखी एक यशस्वी कारवाई करत तडीपाराचा आदेश धाब्यावर बसवणाऱ्या सराईत गुन्हेगाराला अटक केली आहे. आरोपीला पुढील कायदेशीर कारवाईसाठी भोसरी एमआयडीसी पोलीस ठाण्याच्या ताब्यात देण्यात आले आहे.
गुन्हे शाखा युनिट-३चे वरिष्ठ पोलीस निरीक्षक संतोष कसबे यांच्या मार्गदर्शनाखाली पोलीस हवालदार श्रीधन इचके तसेच पोलीस शिपाई निखिल फापाळे आणि तुषार वराडे हे पाहिजे, फरार व तडीपार आरोपींचा शोध घेत होते. यावेळी पोलीस शिपाई निखिल फापाळे यांना मिळालेल्या गोपनीय माहितीच्या आधारे सुनील रमेश इब्राहिम पूरकर(वय २५, रा. सिंहगड कॉलनी, टॉवर लाईन पत्राचाळ, मोरेवस्ती, चिखली, पुणे) यास संभाजी महाराज पुतळ्याजवळ, ओम हॉटेल च्या समोरून बोराडेवाडी मोशी येथून ताब्यात घेऊन पुढील कार्यवाही करण्यात आली.
आरोपीविरुद्ध तडीपार आदेशाचे उल्लंघन केल्याप्रकरणी भोसरी एमआयडीसी पोलीस ठाण्यात महाराष्ट्र पोलीस अधिनियम कलम १४२ अन्वये गुन्हा दाखल करण्यात आला आहे.
तपासात आरोपी हा सराईत गुन्हेगार असल्याचे समोर आले असून त्याच्यावर चिखली पोलीस ठाण्यात घरफोडी, चोरी, मारहाण, खंडणी, दरोडा, गंभीर दुखापत, धमकी तसेच अमली पदार्थ प्रतिबंधक कायद्यान्वये (एनडीपीएस) अशा विविध स्वरूपाचे सहा गुन्हे यापूर्वी नोंद आहेत.
गुन्हे शाखा युनिट-३च्या या कारवाईमुळे तडीपार आरोपींमध्ये पुन्हा एकदा धाक निर्माण झाला असून शहरातील गुन्हेगारांवर पोलिसांचा वचक कायम असल्याचे अधोरेखित झाले आहे. वरिष्ठ पोलीस निरीक्षक संतोष कसबे यांच्या नेतृत्वाखाली ही कारवाई यशस्वीरीत्या पार पडली.
About the Author
