DakshTimes News Network
काशिनाथ शिंदे : पिंपरी चिंचवड
पिंपरी : शहरातील रस्त्यांवरील खड्ड्यांच्या समस्येबाबत राष्ट्रवादी काँग्रेस पक्षाच्या वाहतूक सेलचे शहराध्यक्ष विनोद शंकरराव वरखडे यांनी केलेल्या मागणीची दखल घेत पिंपरी-चिंचवड महानगरपालिकेने खड्डे दुरुस्तीचे काम सुरू केले आहे.
पावसामुळे शहरातील अनेक रस्त्यांवर मोठ्या प्रमाणात खड्डे पडले होते. त्यामुळे वाहनचालकांना त्रास सहन करावा लागत असून अपघाताचा धोका वाढला होता. देहू-आळंदी रस्ता, चिंचवड स्टेशन परिसर, तळवडे, मोशी-चऱ्होली मार्ग, बोऱ्हाडेवाडी तसेच चिंचवड स्टेशन ते चिखली या भागातील रस्त्यांची मोठ्या प्रमाणात दुरवस्था झाली होती. याबाबत विनोद वरखडे यांनी महापालिका प्रशासनाकडे निवेदन देऊन खड्डे तातडीने बुजविण्याची मागणी केली होती. यावेळी राष्ट्रवादी काँग्रेस पक्षाचे पदाधिकारी प्रदीप औटी, भरतशेठ वाळके, अनुराग कुरणे पाटील, अकबर शेख, स्वप्निल चौव्हाण आदी उपस्थित होते. खड्ड्यांमुळे नागरिक, वाहनचालक आणि पादचाऱ्यांना होणारा त्रास लक्षात घेऊन प्रशासनाने त्वरित उपाययोजना करावी, अशी मागणी त्यांनी केली होती.
दरवर्षी पावसाळ्यानंतर खड्डे बुजविले जातात; मात्र पावसामुळे भराव वाहून गेल्याने पुन्हा खड्ड्यांची समस्या निर्माण होते. त्यामुळे तात्पुरत्या दुरुस्तीऐवजी दर्जेदार आणि कायमस्वरूपी उपाययोजना करण्याची आवश्यकता आहे. विनोद वरखडे यांच्या मागणीनंतर महापालिका प्रशासनाने शहरातील विविध भागांमध्ये खड्डे बुजविण्याचे काम सुरू केले आहे. रस्ते दुरुस्तीमुळे नागरिकांना आणि वाहनचालकांना दिलासा मिळणार आहे
