DakshTimes News Network
पिंपरी-चिंचवडमधील शाहूनगर परिसरात वाढत्या चोरीच्या घटनांमुळे नागरिकांमध्ये भीतीचे वातावरण निर्माण झाले असून, या पार्श्वभूमीवर अपर पोलीस आयुक्त सारंग आवाड यांची भेट घेऊन परिसरातील कायदा व सुव्यवस्था अधिक बळकट करण्याची मागणी करण्यात आली.
यावेळी शाहूनगर परिसरात वारंवार घडणाऱ्या चोरीच्या घटनांवर प्रभावी नियंत्रण मिळविण्यासाठी रात्रीचीपोलीस गस्त वाढविणे, संशयित व्यक्तींवर कठोर कारवाई करणे, संवेदनशील भागांवर विशेष लक्ष ठेवणे तसेच नागरिकांच्या सुरक्षिततेसाठी तातडीने उपाययोजना राबविणे या मुद्द्यांवर सविस्तर चर्चा करण्यात आली.
नागरिकांच्या सुरक्षिततेला सर्वोच्च प्राधान्य देत शाहूनगर परिसरातील गुन्हेगारीवर आळा घालण्यासाठी आवश्यक त्या उपाययोजना तातडीने राबवाव्यात, अशी मागणी यावेळी करण्यात आली. तसेच नागरिकांच्या सुरक्षेसाठी प्रशासनाकडे सातत्याने पाठपुरावा करून ठोस उपाययोजना अमलात आणण्यासाठी प्रयत्न सुरू ठेवणार असल्याचेही सांगण्यात आले.
वाढत्या चोरीच्या घटनांमुळे परिसरातील नागरिकांमध्ये असुरक्षिततेची भावना निर्माण झाली असून, पोलिसांनी अधिक प्रभावी गस्त आणि प्रतिबंधात्मक कारवाई करावी, अशी अपेक्षा नागरिकांकडून व्यक्त होत आहे.
