DakshTimes News Network
काशिनाथ शिंदे पिंपरी चिंचवड
थेरगाव परिसरात भरदिवसा झालेल्या चाकू हल्ल्याने परिसरात खळबळ उडाली आहे. मुलाने आठ दिवसांपूर्वी झालेल्या भांडणात मध्यस्थी केल्याचा राग मनात धरून एका ४३ वर्षीय पेंटरवर धारदार चाकूने जीवघेणा हल्ला करण्यात आला. हल्लेखोराने पेंटरसह त्यांच्या कॉन्ट्रॅक्टरवरही चाकूने वार करून गंभीर जखमी केले. या प्रकरणी वाकड पोलिस ठाण्यात खुनाच्या प्रयत्नाचा गुन्हा दाखल करण्यात आला आहे.
ही घटना शनिवारी (११ जुलै) सकाळी सुमारे ९.५० वाजण्याच्या सुमारास थेरगाव येथील पवारनगर, गल्ली क्रमांक ३ मधील खबर पान शॉपसमोर घडली.
याप्रकरणी अविनाश अजिनाथ बाबर (वय ४३, व्यवसाय पेंटर, रा. आदर्श कॉलनी, थेरगाव) यांनी फिर्याद दिली असून, अभि ऊर्फ अभिषेक कोळेकर (वय २५, रा. पडवळनगर, थेरगाव) याच्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आठ दिवसांपूर्वी आरोपी अभि कोळेकर आणि धन्या यांच्यात वाद झाला होता. या भांडणात फिर्यादी बाबर यांचा मुलगा चेतन याने मध्यस्थी करत वाद मिटवला होता. याचाच राग आरोपीच्या मनात होता. आरोपीने यापूर्वीच बाबर यांना त्यांच्या मुलाचे मुंडके कापून हातात देण्याची धमकी दिली होती. त्यावरून दोघांमध्ये शाब्दिक वादही झाला होता.
शनिवारी सकाळी अविनाश बाबर हे त्यांचे कॉन्ट्रॅक्टर विजय भोईर यांच्यासोबत बिगारी कामासाठी मजूर शोधत होते. ते मोटारसायकलवर बसले असताना आरोपी तेथे आला. मोबाईल क्रमांक मागण्याच्या बहाण्याने त्याने बाबर यांच्याशी संवाद साधला. त्यानंतर अचानक “तुझ्या पोराच्या आधी तुझेच मुंडके कापतो,” अशी धमकी देत आरोपीने धारदार चाकूने बाबर यांच्यावर सपासप वार केले. हल्ल्यात बाबर गंभीर जखमी झाले. त्यानंतर आरोपीने विजय भोईर यांच्या पाठीवरही चाकूने वार करून त्यांनाही जखमी केले.
या प्रकरणी वाकड पोलिसांनी भारतीय न्याय संहितेच्या कलम १०९(१), ३५१(२) आणि ३५१(३) अंतर्गत खुनाच्या प्रयत्नाचा गुन्हा नोंदवला असून, पोलीस उपनिरीक्षक गज्जेवार पुढील तपास करीत आहेत.
