Oplus_131072
काशिनाथ शिंदे मुंबई
अन्न व औषध प्रशासनाचे (एफडीए) आयुक्त तुकाराम मुंढे यांनी राज्यभर सुरू असलेल्या धडक कारवाईचा वेग कायम ठेवत आता ब्लडबँक आणि ब्लड स्टोरेज सेंटरमधील अनियमिततांवर मोठी कारवाई केली आहे. मेडिकल दुकाने आणि दूध भेसळ प्रकरणांनंतर आता रक्तपेढ्यांमधील नियमभंग करणाऱ्यांवर एफडीएने कठोर कारवाईचा बडगा उगारला आहे.
गेल्या तीन महिन्यांत २३ ब्लडबँकआणि १५ ब्लड स्टोरेज सेंटरची तपासणी करण्यात आली. तपासणीदरम्यान गंभीर अनियमितता आढळून आल्याने २१ ब्लडबँकांचे परवाने निलंबित करण्यात आले, तर दोन ब्लडबँकांचे परवाने कायमस्वरूपी रद्द करण्यात आले आहेत.
एफडीएने अन्न व औषध सुरक्षेबरोबरच रक्तसुरक्षेच्या बाबतीतही कोणतीही तडजोड केली जाणार नसल्याचे स्पष्ट केले आहे. नियमांचे उल्लंघन करणाऱ्या संस्था आणि संबंधितांवर पुढेही कठोर कारवाई सुरू राहणार असल्याचा इशाराही प्रशासनाने दिला आहे.
राज्यात सुरक्षित आणि दर्जेदार आरोग्यसेवा उपलब्ध करून देण्यासाठी एफडीएची ही मोहीम अधिक तीव्र करण्यात आली असून, अनियमितता आढळणाऱ्या कोणत्याही संस्थेला पाठीशी घातले जाणार नसल्याचा स्पष्ट संदेश या कारवाईतून देण्यात आला आहे.
About the Author
