DakshTimes News Network
काशिनाथ शिंदे पिंपरी चिंचवड
तडीपारीचा आदेश असतानाही बिनधास्तपणे पिंपरी-चिंचवड शहरात वावर करणाऱ्या सराईत आरोपीला चिखली पोलिसांनी कोयत्यासह अटक केली आहे. स्पाइन रोडवरील जॉगर्स पार्क परिसरात संशयास्पद हालचाली करत असलेल्या आरोपीवर पोलिसांनी कारवाई करत त्याला ताब्यात घेतले.
अटक करण्यात आलेला आरोपी २८ वर्षीय असून, त्याच्यावर यापूर्वी तडीपारीची कारवाई करण्यात आली होती. मात्र, संबंधित आदेशाचे उल्लंघन करून तो पुन्हा शहरात फिरत असल्याची माहिती पोलिसांना मिळाली होती. त्यानुसार चिखली पोलिसांनी सापळा रचून त्याला पकडले.
झडतीदरम्यान आरोपीच्या ऑटो रिक्षामधून एक लोखंडी कोयता जप्त करण्यात आला. तसेच आरोपीची ऑटो रिक्षा जप्त करण्यात आली असून, एकूण सुमारे ५०हजार १०० रुपयांचा मुद्देमाल पोलिसांनी हस्तगत केला आहे.
तडीपारीचा आदेश लागू असतानाही आरोपी शहरात कसा दाखल झाला, तो घातक शस्त्रासह नेमक्या कोणत्या उद्देशाने परिसरात फिरत होता आणि त्यामागे आणखी कोणते गुन्हेगारी नियोजन होते का, या सर्व बाबींचा चिखली पोलीस सखोल तपास करत आहेत.
या प्रकरणी आरोपीविरुद्ध भारतीय न्याय संहिता तसेच महाराष्ट्र पोलीस अधिनियम अंतर्गत गुन्हा दाखल करण्यात आला असून, पुढील तपास सुरू आहे.
