Oplus_131072
काशिनाथ शिंदे : मुंबई
महावितरणच्या स्मार्ट मीटरमध्ये ‘कॅमेरा’ असल्याचा खोटा आरोप करून सोशल मीडियाच्या माध्यमातून नागरिकांमध्ये भीती आणि दहशतीचे वातावरण निर्माण केल्याप्रकरणी सिंधुदुर्ग जिल्ह्यातील ग्राहक संघटनेचे प्रतिनिधी नंदन मेघश्याम वेंगुर्लेकर आणि ‘कोकणसाद’ यूट्यूब न्यूज चॅनेलचे संपादक सागर चव्हाण यांच्याविरुद्ध सावंतवाडी पोलीस ठाण्यात फौजदारी गुन्हा दाखल करण्यात आला आहे.
महावितरणने या प्रकरणाची गंभीर दखल घेत, स्मार्ट मीटरबाबत कपोलकल्पित माहिती पसरवून जनतेत भीती निर्माण केल्याचा आरोप केला आहे. तसेच चर्चासत्रातील संदर्भ वगळून दिशाभूल करणारा व्हिडिओ सोशल मीडियावर प्रसारित करून नागरिकांची दिशाभूल करण्यात आल्याचेही तक्रारीत नमूद करण्यात आले आहे.
या प्रकरणी भारतीय न्याय संहितेच्या कलम ३५३ (१)(ब), ३५१ (३), ३५२ आणि ३५६ अन्वये गुन्हा दाखल करण्यात आला असून, पुढील तपास सावंतवाडी पोलीस करीत आहेत.
महावितरणने स्पष्ट केले की, स्मार्ट मीटर हे पूर्णपणे सुरक्षित आणि अत्याधुनिक तंत्रज्ञानावर आधारित असून त्यामध्ये कोणताही कॅमेरा किंवा नागरिकांच्या गोपनीयतेचा भंग करणारी कोणतीही यंत्रणा नाही. त्यामुळे वीजग्राहकांनी अफवा आणि खोट्या माहितीवर विश्वास ठेवू नये, असे आवाहन करण्यात आले आहे. स्मार्ट मीटरबाबत जाणीवपूर्वक खोटी माहिती पसरवणाऱ्यांविरुद्ध यापुढेही कठोर कायदेशीर कारवाई करण्यात येईल, असा इशाराही महावितरणने दिला आहे.
महावितरणच्या माहितीनुसार, सावंतवाडी येथे ‘कोकणसाद’ यूट्यूब चॅनेलवर स्मार्ट मीटर विषयावर चर्चासत्र आयोजित करण्यात आले होते. या चर्चेत महावितरणचे उपकार्यकारी अभियंता योगेंद्र वाघ, ग्राहक संघटनेचे नंदन वेंगुर्लेकर आणि दीपक पटेकर सहभागी झाले होते. महावितरणने स्मार्ट मीटरचे फायदे आणि त्यावरील विविध शंकांचे निरसन केले होते.
मात्र, चर्चेदरम्यान नंदन वेंगुर्लेकर यांनी स्मार्ट मीटरमध्ये ‘कॅमेरा’ असल्याचा दावा केला. त्यावेळी महावितरणचे उपकार्यकारी अभियंता योगेंद्र वाघ यांनी तत्काळ या दाव्याचे खंडन करून वस्तुस्थिती स्पष्ट केली. असे असतानाही, चर्चेतील महावितरणचा खुलासा वगळून केवळ दिशाभूल करणारा दोन ते तीन मिनिटांचा व्हिडिओ ‘स्मार्ट मीटरची चिरफाड’ या मथळ्याखाली सोशल मीडियावर प्रसारित करण्यात आल्याचा आरोप आहे.
या प्रकरणामुळे स्मार्ट मीटरबाबत खोटी माहिती पसरवून जनतेत संभ्रम निर्माण करणाऱ्यांविरुद्ध महावितरणने कठोर भूमिका घेतल्याचे स्पष्ट झाले आहे.
About the Author
