DakshTimes News Network
काशिनाथ शिंदे: नवी मुंबई
कर्तव्याची वेळ संपल्यानंतरही माणुसकीचा धर्म जपत रबाळे वाहतूक शाखेतील दोन पोलीस शिपायांनी प्रसंगावधान दाखवत बेशुद्ध कारचालकाचे प्राण वाचवले. त्यांच्या धाडसी आणि तत्पर कृतीमुळे एका नागरिकाला वेळेत उपचार मिळाल्याने सर्व स्तरातून या दोन्ही पोलिसांवर कौतुकाचा वर्षाव होत आहे.
१७ जुलै २०२६ रोजी रात्री सुमारे साडेदहा वाजण्याच्या सुमारास रबाळे वाहतूक शाखेचे पोलीस शिपाई सचिन ढाले आणि पोलीस शिपाई सचिन सुळ हे नियमित कर्तव्य आटोपून घरी जात होते. त्यावेळी रबाळे येथील रिलायन्स उड्डाणपुलावरील बेलापूर मार्गावर एका कारने दुभाजकाला जोरदार धडक दिल्याचे त्यांच्या निदर्शनास आले.
दोन्ही पोलिसांनी तत्काळ घटनास्थळी धाव घेत कारची पाहणी केली असता चालक बेशुद्ध अवस्थेत असल्याचे आढळून आले. परिस्थितीचे गांभीर्य ओळखून त्यांनी क्षणाचाही विलंब न करता चालकाला सीपीआर (हृदय-फुफ्फुस पुनर्जीवन प्रक्रिया) दिली. काही क्षणांतच चालकाला शुद्ध आली.
यानंतर पोलिसांनी तातडीने चालकाला रबाळे येथील गवळी हॉस्पिटलमध्ये उपचारासाठी दाखल केले. वेळेवर दिलेल्या सीपीआरमुळे चालकाचा जीव वाचल्याची माहिती समोर आली आहे.
रबाळे वाहतूक शाखेतील पोलीस शिपाई सचिन ढाले आणि सचिन सुळ यांनी दाखवलेल्या धाडस, तत्परता आणि माणुसकीमुळे पोलीस दलाची संवेदनशील प्रतिमा अधिक उजळली आहे. त्यांच्या या कार्याचे नागरिकांसह वरिष्ठ पोलीस अधिकाऱ्यांकडूनही विशेष कौतुक करण्यात येत आहे.
