DakshTimes News Network
काशिनाथ शिंदे : पिंपरी
पुणे आणि पिंपरी-चिंचवड महानगर क्षेत्रातील मेट्रोचे जाळे अधिक व्यापक करण्याच्या दृष्टीने महा मेट्रोची महत्त्वपूर्ण उच्चस्तरीय बैठक नुकतीच पार पडली. वाढती लोकसंख्या, वाहतूक कोंडी आणि प्रवाशांच्या सोयीचा विचार करून नवीन प्रस्तावित मेट्रो मार्गांवर या बैठकीत सविस्तर चर्चा करण्यात आली.
बैठकीत भक्ती-शक्ती ते मुकाई चौक तसेच संत तुकाराम नगर – नाशिक फाटा – राष्ट्रीय महामार्ग क्रमांक ६०च्या समांतर चाकणपर्यंत प्रस्तावित मेट्रो मार्गांच्या विकासाला गती देण्याबाबत सकारात्मक चर्चा झाली. या मार्गांमुळे पिंपरी-चिंचवड आणि चाकणदरम्यानची दळणवळण व्यवस्था अधिक सक्षम होणार असून, भविष्यातील वाहतुकीच्या गरजा लक्षात घेऊन नियोजन करण्यात येत आहे.
चाकण हा राज्यातील वेगाने विकसित होणारा औद्योगिक पट्टा असल्याने, या परिसराला मेट्रोची जोड मिळाल्यास हजारो कामगार, नोकरदार, विद्यार्थी आणि नागरिकांना जलद, सुरक्षित व आरामदायी प्रवासाची सुविधा उपलब्ध होणार आहे. याशिवाय शहरातील वाढत्या वाहतूक कोंडीवरही मोठ्या प्रमाणात नियंत्रण मिळविण्यास या प्रकल्पाची मदत होणार असल्याचे बैठकीत नमूद करण्यात आले.
प्रस्तावित मेट्रो मार्गांमुळे औद्योगिक विकासाला चालना मिळण्याबरोबरच सार्वजनिक वाहतूक व्यवस्था अधिक सक्षम होईल, असा विश्वास बैठकीत व्यक्त करण्यात आला. या महत्त्वाकांक्षी प्रकल्पामुळे पिंपरी-चिंचवड आणि चाकण परिसरातील नागरिकांना भविष्यात आधुनिक, जलद आणि पर्यावरणपूरक प्रवासाचा नवा पर्याय उपलब्ध होणार आहे.
