DakshTimes News Network
काशिनाथ शिंदे : भूगाव बावधान
भुगाव येथील अमन होंडा समोरील पद्मावती हॉटेल परिसरात बावधन पोलिसांनी कारवाई करत हॉटेल चालकाकडून तब्बल १ किलो ९९२ ग्रॅम गांजा जप्त केला. जप्त गांजाची अंदाजे किंमत १ लाख रुपये असल्याची माहिती पोलिसांनी दिली. या प्रकरणी गांजा विक्रीसाठी दिल्याच्या आरोपावरून दोघांविरुद्ध एनडीपीएस कायद्यान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, रुपेश गोपाळ शेट्टी (वय ३८, रा. शेडगेवाडा, भुगाव, ता. मुळशी) हा हॉटेल व्यवसाय करतो. त्याच्याकडे बेकायदेशीररीत्या गांजा बाळगल्याचे आढळून आले. तो गांजा विक्री करण्याच्या उद्देशाने जवळ बाळगत असल्याचा पोलिसांचा आरोप आहे.
दरम्यान, कृष्णा साखरे (रा. मुंडेवस्ती, बावधन, पुणे) याने विक्रीसाठी हा गांजा रुपेश शेट्टी याला दिल्याचा पोलिसांचा आरोप आहे. त्यामुळे दोघांविरुद्ध एनडीपीएस अॅक्ट कलम ८(क), २०(ब)(ii)(ब) अन्वये गुन्हा दाखल करण्यात आला आहे. या कारवाईत रुपेश शेट्टी याला अटक करण्यात आली आहे.
ही कारवाई १० ऑगस्ट २०२६ रोजी सायंकाळी पाचच्या सुमारास पद्मावती हॉटेल परिसरात करण्यात आली. त्यानंतर रात्री ९.५७ वाजता बावधन पोलीस ठाण्यात गुन्हा दाखल करण्यात आला.
या प्रकरणाचा पुढील तपास पोलीस उपनिरीक्षक शितल गिरी करीत आहेत. गांजा नेमका कुठून आणण्यात आला, या प्रकरणामागे आणखी कोणाचा सहभाग आहे का आणि गांजाची विक्री कोणाला केली जाणार होती, याचा तपास पोलीस करीत आहेत.
