DakshTimes News Network
काशिनाथ शिंदे : सातारा
भुईंज पोलीस ठाण्याच्या हद्दीतील सुरूर (ता. वाई) येथील बाजार तळावर रात्रगस्तीवर असलेल्या पोलीस पथकावर अज्ञात हल्लेखोरांनी प्राणघातक हल्ला केल्याची धक्कादायक घटना सोमवारी (दि. १०) मध्यरात्री १२.४५ वाजण्याच्या सुमारास घडली. या हल्ल्यात पोलीस कॉन्स्टेबल किरण निंबाळकर गंभीर जखमी झाले असून, प्रकरणातील एका संशयिताला पोलिसांनी ताब्यात घेतले आहे.
मिळालेल्या माहितीनुसार, सुरूर येथील बाजार तळाच्या परिसरात काही संशयास्पद व्यक्ती थांबल्या असल्याची माहिती रात्रगस्तीवरील पोलिसांना मिळाली होती. त्यानंतर पोलीस उपनिरीक्षक सूरज शिंदे, कॉन्स्टेबल किरण निंबाळकर, सतीश कदम आणि होमगार्ड यांचे पथक तातडीने घटनास्थळी दाखल झाले.
पोलिसांनी परिसरातील व्यक्तींकडे चौकशी केली असता, फलटण येथील काही जण त्यांना मारण्यासाठी येणार असल्याची माहिती त्यांनी दिली. त्यानंतर परिस्थितीची पाहणी सुरू असतानाच काही अज्ञात हल्लेखोरांनी पोलीस पथकावर हल्ला केला. या हल्ल्यात कॉन्स्टेबल किरण निंबाळकर गंभीर जखमी झाले.
घटनेनंतर भुईंज पोलिसांनी तातडीने तपासाची चक्रे फिरवत एका संशयिताला ताब्यात घेतले आहे. हल्ल्यामागील नेमके कारण, सहभागी आरोपींची संख्या आणि त्यांची भूमिका याबाबत पोलीस अधिक तपास करीत आहेत. फरार संशयितांचा शोध घेण्यासाठी पोलिसांकडून विविध पथकांच्या माध्यमातून तपास सुरू आहे.
रात्रगस्तीवरील पोलिसांवरच थेट प्राणघातक हल्ला झाल्याने परिसरात खळबळ उडाली असून, कायदा-सुव्यवस्थेच्या दृष्टीने या घटनेचे गांभीर्य वाढले आहे.
