DakshTimes News Network
काशिनाथ शिंदे : पिंपरी
पिंपरी-चिंचवड महानगरपालिकेच्या अधिकृत बोधचिन्हात महत्त्वपूर्ण बदल करण्यात येणार असून, नव्या बोधचिन्हाच्या अंतिम नमुन्यास स्थायी समितीने मंजुरी दिली आहे. स्थायी समितीचे सभापती अभिषेक बारणे यांच्या अध्यक्षतेखाली झालेल्या बैठकीत हा निर्णय घेण्यात आला.
नव्या बोधचिन्हामध्ये छत्रपती शिवाजी महाराजांची अश्वारूढ प्रतिमा तसेच ‘कटिबद्ध जनहिताय’ हे ब्रीदवाक्य समाविष्ट करण्यात आले आहे. छत्रपती शिवाजी महाराजांचे लोककल्याणकारी विचार आणि जनहिताला केंद्रस्थानी ठेवणारी प्रशासनाची भूमिका या संकल्पनेतून बोधचिन्हाची रचना करण्यात आली आहे.
महापालिका प्रशासनाच्या ठरावानुसार नव्या बोधचिन्हाचा अंतिम नमुना मान्य करण्यात आला आहे. नागरिकांच्या हितासाठी राबविण्यात येणाऱ्या विविध विकासकामे आणि प्रशासकीय उपक्रमांमध्ये ‘कटिबद्ध जनहिताय’ हा संदेश महापालिकेच्या जनसेवेचे प्रतीक ठरणार आहे.
स्थायी समितीची मंजुरी मिळाल्यानंतर आता नव्या बोधचिन्हाच्या अंमलबजावणीची प्रक्रिया सुरू होणार आहे. आवश्यक आकारमानानुसार हे बोधचिन्ह महापालिका मुख्यालयासह विविध विभागीय कार्यालये आणि महापालिकेच्या इमारतींवर दर्शनी ठिकाणी लावण्यात येणार आहे.
नव्या बोधचिन्हाच्या अंमलबजावणीसाठी आवश्यक प्रशासकीय कार्यवाही तातडीने पूर्ण करण्याचे निर्देश देण्यात आले आहेत. त्यामुळे आगामी काळात पिंपरी-चिंचवड महापालिकेच्या अधिकृत कामकाजात आणि विविध कार्यालयांमध्ये हे नवीन बोधचिन्ह झळकणार आहे.
